રાજકોટમાં કોંગ્રેસને ઝટકો:વોર્ડ નં.14ના કોંગી ઉમેદવાર વિજય જાનીએ ફોર્મ પાછું ખેંચ્યું, ભાજપ પ્રમુખે સભામાં જાહેરાત કરી

રાજકોટ મહાપાલિકાની ચૂંટણીને લઈ રાજકીય માહોલ ગરમાયો છે, તેવા સમયે જ રાજકોટમાં કોંગ્રેસને પ્રથમ ઝટકો લાગ્યો છે. વોર્ડ નં.14ના કોંગ્રેસના ઉમેદવાર વિજય જાનીએ ફોર્મ પાછું ખેંચ્યું છે. તે સાથે જ કોંગીજનોમાં ખળભળાટ મચી ગયો છે. આ માહિતી માધ્યમો થકી ભાજપ શહેર પ્રમુખ કમલેશ મીરાણીને મળતા ભરી સભામાં તેમણે આ અંગે જાહેરાત કરી હતી.

વાળાને મેન્ડેટ ન અપાતા જાની નારાજ
ઉલ્લેખનીય છે કે, વિજય પોતે વોર્ડ નં.14ના કોંગ્રેસ પ્રમુખ પણ છે, સુત્રોમાંથી મળતી માહિતી મુજબ, વોર્ડ નં.14ના પૂર્વ પ્રમુખ માણસુર વાળાએ ફોર્મ ભરવા પૂરતી તૈયારીઓ કરી લીધી હતી, પરંતુ માણસુર વાળાના બદલે મયુરસિંહ પરમારના નામનું મેન્ડેટ આવતા માણસુર વાળાની ટિકિટ કપાઈ હતી. વિજય જાની અને માણસુર વાળા વચ્ચે સારા સંબંધો હોય, જેથી નારાજ થઈ વિજયએ ફોર્મ પાછું ખેંચ્યું હોવાનું જાણવા મળ્યું છે.