રાજકોટ મહાપાલિકાનો રણસંગ્રામ ચૂંટણી 2021:કન્ફર્મ કે કપાયા, ભાજપના દાવેદારો મૂંઝાયા, શુક્લ, રામાણી, ટીલાળા સહિત 9 નામ ફાઈનલ

ભાજપ પાર્લામેન્ટરી બોર્ડમાં નિરીક્ષકો નામ મૂકે તે પહેલા પ્રમુખ પાટીલે ત્રણ ચૂંટણી લડેલા અને 60 વર્ષથી મોટી ઉંમર હોય તેમને ભાજપ ટિકિટ નહીં આપે તેવી જાહેરાત કર્યા બાદ અનેક વોર્ડમાં પેનલ બદલવી પડે તેવી સ્થિતિ છે. જેના કારણે પ્રદેશ ભાજપમાં રાજકોટના નામ ફાઇનલ કરવા માટે લાંબી ચર્ચા ચાલી હતી. બીજી તરફ સંભવિત ઉમેદવારો પણ બુધવારે દિવસ દરમિયાન ફાઇનલ કે કપાયા તેની જ ચર્ચા કરી હતી.

દિવ્ય ભાસ્કર પાસે આવેલી વિગત મુજબ ભાજપમાંથી પુષ્કર પટેલ, જયાબેન ડાંગર, પરેશ પીપળિયા, નેહલ શુક્લ, નીતિન રામાણી, જ્યોત્સનાબેન ટીલાળા, દેવુબેન જાદવ, નિલેશ જળુ, કેતન પટેલના નામ પર ભાજપની પાર્લામેન્ટરી બોર્ડમાં સહમતી થઇ છે. આ ઉપરાંત અન્ય નામો પર ચર્ચા ચાલી રહી છે. 60 વર્ષથી વધુ ઉંમર અને ત્રણ વખત ચૂંટણી લડેલા નેતાને ટિકિટ નહીં આપવાના માપદંડના પગલે ઉમેદવારો ફાઇનલ કરવામાં પાર્લામેન્ટરી બોર્ડના સભ્યો અને રાજકોટ ભાજપના આગેવાનો વચ્ચે લાંબી ચર્ચા ચાલી રહી છે. પ્રદેશ ભાજપ ગુરુવારે મોડી સાંજે ઉમેદવારોનું પ્રથમ લિસ્ટ જાહેર કરે તેવી શક્યતા છે. જો કે, છેલ્લી ઘડીએ ભાજપમાં ઉમેદવારોના નામ જાહેર કરવા માટે પ્રદેશના આગેવાનો વચ્ચે ખેંચતાણ થતી હોવાની ચર્ચા છે.