સભા સાંજે અને રોડ સવારથી બંધ:કોઠારિયા રોડ પર ભાજપ-કોંગ્રેસનું રાજ, ચૂંટાયા પહેલા દબાણ શરૂ

રાજકોટ મહાનગરપાલિકાની ચૂંટણીમાં મતદારો બિચારા બની ગયા છે. ભાજપ અને કોંગ્રેસ વોર્ડમાં કાર્યાલય ખોલવા માટે મુખ્યમાર્ગો કલાકો સુધી બંધ કરી દે છે જેના કારણે હજારો વાહનચાલકોને હાલાકીનો સામનો કરવો પડ્યો હતો. આ તમામ માર્ગો પર સીસીટીવી કેમેરા હોવા છતાં રાજકોટ પોલીસે કોઇ પણ પ્રકારના પગલાં લીધા ન હતા. વોર્ડ નં.16માં કોંગ્રેસે કોઠારિયા રોડ પર નીલકંઠ સિનેમા પાસેથી દેવપરા માર્કેટ સુધી તેમજ ભાજપે જંગલેશ્વરના ખૂણા પાસેથી કોઠારિયા રોડ બંધ કર્યો હતો.

બન્ને રાજકીય પક્ષોએ સવારથી મુખ્ય રોડ બંધ કર્યો હતો જેના પગલે ત્યાંથી પસાર થતા હજારો વાહનચાલકોએ હાલાકીનો સામનો કર્યો હતો. આ ઉપરાંત વોર્ડ નં.17માં સહકારનગર મેઇન રોડ અને હરિ ઘવા મેઇન રોડ પણ કોંગ્રેસે બંધ કર્યો હતો. શહેરમાં ઠેર ઠેર ભાજપ-કોંગ્રેસે શહેરના મુખ્યમાર્ગો બંધ કરી સભાઓ કરી હજારો લોકોને બાનમાં લીધા હતા. ફોર્મ ભરવાની શરૂઆત કરી ત્યારે ભાજપ-કોંગ્રેસે શહેરના મુખ્ય માર્ગ રેસકોર્સ રિંગ રોડ અને ઢેબર રોડ બંધ કર્યા હતા. આ સમયે પોલીસની મંજૂરી લેવામાં આવી હતી, પરંતુ હજારો વાહનચાલકોને 24 કલાક કરતા વધુ સમય ટ્રાફિકમાંથી પસાર થવાની ફરજ પડી હતી. હવે વોર્ડના કાર્યાલય ખોલવા માટે રોડ બંધ કરવામાં આવી રહ્યા છે.