કોરોના રાજકોટ LIVE:બીજે દિવસે કોરોનાની હેટ્રિક, નવા 3 કેસ નોંધાયા, કોપર સીટીમાં 16 વર્ષીય સગીરા અને મહારાષ્ટ્રથી આવેલી 40 વર્ષીય મહિલા પોઝિટિવ

રાજકોટએક મહિનો પહેલા
  • કૉપી લિંક
પ્રતિકાત્મક તસવીર. - Divya Bhaskar
પ્રતિકાત્મક તસવીર.
  • છેલ્લા ત્રણ અઠવાડિયામાં કોરોનાના કુલ 9 કેસ નોંધાયા

રાજકોટમાં નવરાત્રિનો તહેવાર પુર થતા જ કોરોનાએ દેખા દીધા છે. ગઇકાલે મંગળવારે જામનગર રોડ પર આવેલી બે સોસાયટીમાં એકસાથે 3 કેસ નોંધાતા આરોગ્ય વિભાગમાં દોડધામ મચી ગઇ છે. ત્યાં આજે ફરી હાલ જામનગર રોડ પર આવેલા કોપર સીટીમાં નવા 3 કેસ નોંધાયા છે. જેમાં 16 વર્ષીય સગીરા અને મહારાષ્ટ્રથી આવેલી 40 વર્ષીય મહિલા પોઝિટિવ આવ્યા છે. જેને પગલે પોઝિટિવ દર્દીની આસપાસ રહેતા તમામ લોકોના ટેસ્ટ આરોગ્ય વિભાગ દ્વારા કરવામાં આવશે. ઉલ્લેખનીય છે કે પતિ-પત્ની સહિત ત્રણેય પોઝિટિવ દર્દીએ વેક્સિનના બંને ડોઝ લીધા હતા. આજે કોરોના સામેની રસીકરણમાં 18 વર્ષથી મોટી ઉંમરના કુલ 6049 નાગરિકોએ રસી લીધી હતી.

ત્રણેય દર્દીઓએ રસીના બન્ને ડોઝ લીધા છે
રાજકોટના જામનગર રોડ પર આવેલી સરકારી પ્રેસ સોસાયટીના 50 વર્ષીય મહિલા, વસુધા સોસાયટીના 57 વર્ષીય પતિ અને 52 વર્ષીય પત્નીનો રિપોર્ટ પોઝિટિવ આવ્યો છે. આરોગ્ય અધિકારીના જણાવ્યા મુજબ આ ત્રણેય દર્દીઓએ રસીના બન્ને ડોઝ લીધેલા છે, તેમ છતાં કોરોના રિપોર્ટ પોઝિટિવ આવતા તેમના સંપર્કમાં આવેલા લોકોનો ટેસ્ટ કરવા મનપાની આરોગ્ય ટીમે તજવીજ હાથ ધરી છે.આ કેસની કોઇ હિસ્ટ્રી ન મળ્યા બાદ અગાઉ પરિવારના એક સભ્યને કોરોના થયો હોય તેનું જામનગર કનેકશન લાગુ પડયાનું બહાર આવ્યું છે.

યુથ કોંગ્રેસના નેતાને ડેન્ગ્યુ ભરખી ગયો
આજે રાજકોટ જિલ્લા યુથ કોંગ્રેસના લડાયક નેતા વિરેન્દ્રસિંહ જાડેજાનું 39 વર્ષની વયે દુઃખદ નિધન થયું છે. તેઓ ડેન્ગ્યુની સારવાર લઈ રહ્યા હતા ત્યારે આજે બપોરે રાજકોટની ખાનગી હોસ્પિટલમાં તેઓએ અંતિમ શ્વાસ લેતા પરિવારમાં શોક છવાયો છે.

શહેરમાં હાલ 4 એક્ટિવ કેસ છે
રાજકોટ કોર્પોરેશન વિસ્તારમાં નવા 3 કેસ સાથે એક દર્દી ડિસ્ચાર્જ પણ થયો હતો. શહેરમાં હાલ 4 એક્ટિવ કેસ છે, અત્યાર સુધીમાં કુલ સંક્રમિતોની સંખ્યા 42832એ પહોંચી છે. રાજકોટ શહેરમાં ગઇકાલે 4324 અને ગ્રામ્ય વિસ્તારમાં 876 નાગરિકે વેક્સિન મુકાવી હતી. શહેરમાં કોરોનાની સંભવિત ત્રીજી લહેર આવવાની શક્યતાને લઈને હવે રાજકોટ શહેરમાં કોરોનાના કેસ વધવા લાગ્યા છે.

છેલ્લા ત્રણ અઠવાડિયામાં 9 પોઝિટિવ કેસ નોંધાયા
છેલ્લા ત્રણ અઠવાડિયામાં કોરોનાના કુલ 9 કેસ નોંધાયા છે. જેમાં 1 ઓક્ટોબરે એક કેસ, 5 ઓક્ટોબરે 2 કેસ, 8 ઓક્ટોબરે 1 કેસ, 11 ઓક્ટોબરે 1 કેસ, 12 ઓક્ટોબરે 1 કેસ, 19 ઓક્ટોબરે 3 કેસ કોરોના વાઇરસના નોંધાયા છે. જેમાં મંગળવારે એકસાથે ત્રણ કેસ નોંધાયા છે. જ્યારે શહેરમાં એક્ટિવ કેસની સંખ્યા ચાર પર પહોંચી છે. તેમજ મંગળવારે એક દર્દીને રજા આપવામાં આવી હતી.

શહેરમાં અત્યાર સુધી 17,66,228 નાગરિકને કોરોનાની રસી અપાઈ
શહેરમાં અત્યાર સુધી 17,66,228 નાગરિકને કોરોનાની રસી અપાઈ ગઈ છે. જેમાં 11,28,819 નાગરિકને પ્રથમ ડોઝ અને 6,37,409 નાગરિકને બીજો ડોઝ અપાઈ ગયો છે. એટલે કે શહેરમાં 98 ટકાથી વધુ લોકોને પ્રથમ ડોઝ અને 55 ટકાથી વધુ લોકોને બીજો ડોઝ અપાઈ ગયો છે. તેમ છતાં કોરોનાના કેસ આવતા હવે તંત્ર દ્વારા આગવું આયોજન કરવામાં આવશે.

અન્ય સમાચારો પણ છે...