કાર્યવાહી:31 ડિસેમ્બર પહેલા રાજકોટ SOGએ કપ-રકાબીના બોક્સની આડમાં છૂપાવેલા દારૂના જથ્થા સાથે એકને ઝડપી પાડ્યો, 13 લાખથી વધુનો મુદ્દામાલ જપ્ત

31 ડિસેમ્બરે પ્યાસીઓની પ્યાસ બુઝાવવા બુટલેગરો મેદાને પડ્યા છે. ત્યારે પોલીસ પણ છેલ્લા 15 દિવસથી સતર્ક બની ગઈ છે. રાજકોટ SOGએ કપ-રકાબીના બોક્સ નીચે છૂપાવીને લાવવામાં આવી રહેલા દારૂના જથ્થા સાથે એક શખ્સને ઝડપી પાડ્યો છે. પોલીસે કુલ 13 લાખથી વધુનો મુદ્દામાલ જપ્ત કરી એકની અટકાયત કરી છે.

SOGએ આઈસરચાલકની અટકાયત કરી
રાજકોટ SOG પેટ્રોલિંગમાં હતી તે દરમિયાન SOGએ બાતમીના આધારે રાજકોટ-અમદાવાદ હાઈવે પર બેટી ગામના પાટીયા પાસે આઈસર ચાલકને રોકીને તપાસ કરતા આઈસરમાં કપ-રકાબીના બોક્સ નીચેથી વિદેશી દારૂની બોટલો મળી આવી હતી. જેથી પોલીસે આઈસરના ચાલક આજમ છારોરા (ઉં.વ.34)ની અટકાયત કરી 6 લાખની કિંમતના દારૂ સહિત કુલ 13 લાખ 84 હજારનો મુદ્દામાલ જપ્ત કર્યો હતો.

પોલીસે જપ્ત કરેલો મુદ્દામાલ
- 1488 નંગ દારૂની બોટલ (કિંમત રૂ.- 6,01,200)
- 450 નંગ કપ- રકાબીના બોક્સ (કિંમત- 90,000)
- આઈસર ગાડી નંબર UP 50 BT 9914 (કિંમત રૂ- 7,00,000)
- મોબાઈલ (કિંમત રૂ- 3,000)