હુમલો:‘તમે ફિક્સ ડિપોઝિટનું વ્યાજ ખાઇ ગયા છો’ કહી બેંક મેનેજર પર હુમલો

શહેરના પેડક રોડ પર આવેલી સ્ટેટ બેંક ઓફ ઇન્ડિયાની રણછોડનગર બ્રાંચના મેનેજર રાયસિંહ ધીરૂભાઇ જણકાટ પર સંતકબીર રોડ, સદગુરુ સોસાયટી-2માં રહેતા ધરમશી મુળજી રાઘવાણી નામના બેંક ખાતેદારે હુમલો કરી ઇજા પહોંચાડ્યાની પોલીસમાં ફરિયાદ નોંધાઇ છે. ફરિયાદ મુજબ, બે દિવસ પહેલા તેઓ બેંક પર હતા.

ત્યારે એક ખાતેદાર બેંકમાં દેકારો કરતા હતા. જેથી પોતે બહાર આવી ખાતેદાર પાસે પહોંચ્યા હતા. ત્યારે ખાતેદારે બૂમાબૂમ કરી તમે મારી ફિક્સ ડિપોઝિટનું વ્યાજ ખાઇ ગયા છો કહી ગાળો ભાંડવા લાગ્યો હતો. તમે બધા એક છો, મારું વ્યાજ ખાઇ ગયાનો આક્ષેપ કર્યો હતો. બેંકમાં ખાતેદારે માથાકૂટ કરતા મેનેજરે પોલીસને બોલાવવા માટે મોબાઇલ કરી રહ્યા હતા. આ સમયે ખાતેદાર અચાનક તેની પાસે રહેલા લોખંડના પાના સાથે ધસી આવી હુમલો કરી માથામાં ત્રણ ઘા ફટકારી દીધા હતા. જેને કારણે માથામાંથી લોહી નીકળવા લાગ્યું હતું. પોતાના પર હુમલો થતા સિક્યુરિટી ગાર્ડ અને અન્ય કર્મચારીઓ દોડી આવ્યા હતા.