એજ્યુકેશન:નેક માટે દરેક ભવનને 90-90 હજાર ફાળવ્યા, વાપરવાના ક્યા તેનો યુનિ.એ પરિપત્ર જ ન કર્યો

સૌરાષ્ટ્ર યુનિવર્સિટીની છેલ્લી ફાઇનાન્સ કમિટીમાં નેક માટે દરેક ભવનને રૂ.90-90 હજાર ફાળવવાનો નિર્ણય સત્તાધીશોએ લીધો હતો, પરંતુ તેનો ઉપયોગ ક્યાં અને કેવી રીતે કરવો તેનો પરિપત્ર જ કરવાનું ભૂલી જતા ભવનોના ‌વડા આ નાણાંનો ઉપયોગ ક્યાં કરવો તેની વિમાસણમાં મુકાયા છે.

સૌરાષ્ટ્ર યુનિવર્સિટીમાં આગામી જાન્યુઆરીમાં નેકની ટીમ મૂલ્યાંકન માટે આવનારી છે ત્યારે યુનિવર્સિટીને ‘એ’ અથવા ‘એ પ્લસ’ ગ્રેડ અપાવવા સત્તાધીશોએ કવાયત આદરી છે અને તેના ભાગરૂપે છેલ્લી ફાઇનાન્સ કમિટીની બેઠકમાં દરેક ભવનને રૂ.90-90 હજાર ફાળવ્યા હતા. ભવનોને રૂ.90-90 હજાર જેવી તગડી રકમ ફાળવી દીધા બાદ પણ સત્તાધીશોએ આ નાણાં ક્યા વાપરવાના છે, કેટલી મર્યાદામાં વાપરવાના છે, ક્યા કામ માટે વાપરી શકાય, તે બાબતનુ માર્ગદર્શન પૂરું પાડતો પરિપત્ર બહાર પાડતાં જ ભૂલી જતા ભવનોના વડા નાણાં વાપરવાના મુદ્દે મૂંઝવણમાં મુકાયા છે.

આ મુદ્દે કુલપતિ ડો.નીતિન પેથાણીએ જણાવ્યું હતું કે, આ બજેટરિયલ જોગવાઇ હેઠળ ફાળવવામાં આવેલા નાણાં છે અને તેનો ઉપયોગ બિલ્ડિંગના બ્યુટીફિકેશન અને અન્ય જરૂરી ખર્ચમાં કરી શકાશે. આ માટે કોઇ પરિપત્ર કરવાની જરૂરિયાત નથી.