ઇલેક્ટ્રિક કરન્ટ લાગ્યાની કહાની ઘડી:ગોંડલના શિવરાજગઢમાં સાઇકલ ચલાવવા બાબતે કિશોરની હત્યા, આરોપીએ હત્યા છુપાવવા ગરમ તેલથી બાળકના શરીરે દાઝ્યાનાં નિશાન કર્યાં

ગોંડલ8 મહિનો પહેલા
આરોપી મુકેશ જમેરા. - Divya Bhaskar
આરોપી મુકેશ જમેરા.
  • સગીરની હત્યા છુપાવવા આરોપીએ રૂ દ્વારા ગરમ તેલથી બાળકના શરીરે દાઝ્યાના નિશાન કરી ઈલેક્ટ્રીક શોક લાગ્યાની વાર્તા કરી
  • ફોરેન્સિક પીએમમાં સત્ય સામે આવ્યું

ગોંડલના શિવરાજગઢ ગામે સગીરે પૂછ્યા સાઇકલ ચાલવતાં રોષે ભરાયેલા પાડોશીએ ગળાટૂંપો દઈ મોતને ઘાટ ઉતાર્યાની ઘટના સામે આવી છે. પછી આરોપીએ બનાવને ઈલેક્ટ્રિક કરન્ટમાં ખપાવી દેવા બાળકના શરીરે ગરમ તેલના ડામ આપ્યા હતા, પરંતુ ફોરેન્સિક પીએમમાં સત્ય સામે આવતાં પોલીસે ગણતરીના કલાકોમાં જ આરોપી પાડોશીની ધરપકડ કરી હતી

પાડોશી મુકેશ પર શંકા વ્યક્ત કરવામાં આવી
પ્રાપ્ત વિગતો મુજબ, તાલુકાના શિવરાજગઢ ગામે પ્રફુલભાઈ મદડિયાની વાડીએ ખેતમજૂરીનું કામ કરતા રેખાબેન ઉર્ફે રેવકાબાઈ સંજયભાઈ ડોડવેના 13 વર્ષીય પુત્ર આકાશની ગળાટૂંપો દઈ નિર્મમ હત્યા થઈ હોવાની ફરિયાદ ગોંડલ તાલુકા પોલીસમાં દાખલ થઈ હતી, જેમાં મૃતકની માતાએ જણાવ્યું હતું કે ગત રોજ બપોરના એક વાગ્યાની આસપાસ આકાશ પાડોશમાં રહેતા મુકેશની સાઇકલ ચલાવતો હતો અને થોડીવાર બાદ ત્યાં જોવા ન મળતાં તેની તપાસ શરૂ કરતાં મગફળીના ઢગલા ઉપર હાથ-પગેથી દાઝી ગયેલી હાલતમાં મૃત હાલતમાં મળી આવ્યો હતો અને તેઓ દ્વારા પાડોશી મુકેશ પર શંકા વ્યક્ત કરવામાં આવી હતી.

આરોપીએ રૂ દ્વારા ગરમ તેલથી બાળકના શરીરે દાઝ્યાનાં નિશાન કર્યાં.
આરોપીએ રૂ દ્વારા ગરમ તેલથી બાળકના શરીરે દાઝ્યાનાં નિશાન કર્યાં.

શ્વાસ રુંધાવાથી મોત નીપજ્યાનું ખૂલ્યું
બનાવ અંગે પોલીસ સૂત્રોએ જણાવ્યું હતું કે બાળકનાં પરિવારજનો દ્વારા પ્રથમ ઈલેક્ટ્રિક કરન્ટ લાગવાથી મોત નીપજ્યું હોવાનું જણાવાયું હતું, પરંતુ સરકારી હોસ્પિટલના તબીબો અને બનાવ સ્થળ પર પોલીસને શંકા જતાં બાળકના મૃતદેહને ફોરેન્સિક પીએમ માટે રાજકોટ ખસેડવામાં આવ્યો હતો અને પીએમ રિપોર્ટમાં શ્વાસ રુંધાવાથી મોત થયું હોવાનું બહાર આવતાં પોલીસ પણ ચોંકી ઊઠી હતી અને તપાસના ચક્રો ગતિમાન કર્યાં હતાં.

આરોપીની કબૂલાતથી પોલીસ પણ ચોંકી ઊઠી હતી
આરોપીની કબૂલાતથી પોલીસ પણ ચોંકી ઊઠી હતી

શરીરે દાઝ્યાના ડાઘ પાડી દીધા
જેને પગલે શંકાના આધારે પોલીસે પાડોશી મૂળ MPના વતની મુકેશ જમેરા (ઉં. 28)ની ધરપકડ કરી આકરી પૂછપરછ કરતાં મુકેશે ગુનો કબૂલી લીધો હતો. મુકેશે પોલીસ પૂછપરછમાં જણાવ્યું હતું કે આકાશ તેની સાઇકલ પૂછ્યા વગર અવારનવાર ફેરવ્યા કરતો હતો અને એમાં પંચર પાડી દેતો હતો, એ ઉપરાંત તેનાં સંતાનો સાથે ઝઘડો પણ કરતો હતો, જેનો ખાર રાખી તેને ગળાટૂંપો દઈ હત્યા નીપજાવી દીધી હતી. બાદમાં આ હત્યાની ઘટનાને અકસ્માતમાં ખપાવી દેવા ગરમ તેલ કરી રૂ દ્વારા આકાશના શરીરે દાઝ્યાના ડાઘ પાડી દીધા હતા અને ઈલેક્ટ્રિક શોર્ટસર્કિટથી તેનું મોત નીપજ્યાની કહાની ઘડી કાઢી હતી. આરોપીની કબૂલાતથી પોલીસ પણ ચોંકી ઊઠી હતી.

( હિમાંશુ પુરોહિત અને દેવાંગ ભોજાણી, ગોંડલ )