રાજકોટમાં 2 દિવસમાં 2 હત્યા:કોઠારીયા રોડ પર યુવકને બોથડ પદાર્થના ઘા ઝીંકી નિર્મમ હત્યા, મિત્રએ ઢીમ ઢાળી દીધાની શંકા

રાજકોટ23 દિવસ પહેલા
મૃતકની ફાઈલ તસવીર

રાજકોટ શહેરમાં 2 દિવસમાં 2 હત્યાના બનાવ સામે આવ્યો છે. શહેરના કોઠારીયા રોડ વિસ્તારમાં આવેલ સ્વાતિપાર્ક નજીક ગીત ઇન્ડસ્ટ્રીઝમાં ઓરડી નજીક પરપ્રાંતીય યુવકની બોથડ પદાર્થના ઘા ઝીંકી હત્યા નિપજાવવામાં આવી છે. બનાવની જાણ થતા પોલીસ અધિકારીઓ ઘટના સ્થળે દોડી ગયા હતા અને ડોગ સ્કોવર્ડ તેમજ FSLની મદદ લઇ મૃતદેહને પોસમોર્ટમ અર્થે ખસેડી કાર્યવાહી હાથ ધરી છે.

લોહીલુહાણ હાલતમાં મૃતદેહ મળ્યો
રાજકોટ શહેરમાં છેલ્લા ઘણા સમયથી ચોરી, લૂંટ, હત્યા અને મારામારીના બનાવમાં વધારો થતો જોવા મળી રહ્યો છે. શનિવારે થયેલી હત્યાનો ભેદ ઉકેલાયો ને બીજા જ દિવસે વધુ એક પરપ્રાંતીય યુવાનની હત્યાનો બનાવ સામે આવ્યો છે. આજે વહેલી સવારે શહેરના કોઠારીયા મેઈન રોડ સ્વાતિપાર્ક નજીક આવેલી ગીતા ઇન્ડસ્ટ્રીઝ એરિયાની ઓરડી પાસે પરપ્રાંતીય યુવાનનો લોહીલુહાણ હાલતમાં મૃતદેહ પડ્યો હોવાની જાણ થતાં જ 108ના EMT ભાવેશભાઈ ભીલ અને પાયલોટ જયેશભાઈ કોડિયાતર તેમજ આજીડેમ પોલીસ મથકના PI વી.જે.ચાવડા અને PSI સિંધવ તેમજ પોલીસ સ્ટાફ ઘટનાસ્થળે દોડી ગયો હતો. સ્થળ પર પહોંચી તપાસ કરતા યુવાનને મોઢા પર તેમજ માથાના ભાગે બોથડ પદાર્થના ઘા ઝીંકી હત્યા નિપજાવી હોવાનું પ્રાથમિક તપાસમાં સામે આવ્યું હતું.

યુવક મૂળ ઓરિસ્સાનો વતની
મૃતકનું નામ સુરેશ રાજેન્દ્રભાઈ ભુઈ (ઉ.વ.21) હોવાનું પોલીસ તપાસમાં સામે આવ્યું છે. યુવક પોતે મૂળ ઓરિસ્સાનો વતની હોવાનું અને મજૂરી કામ કરી પોતાનું ગુજરાન ચલાવતો હોવાનું સામે આવ્યું છે. સુરેશ જે ઓરડીમાં રહેતો ત્યાં તેની સાથે તેનો મિત્ર પણ રહેતા હતા. આજે સવારે જ્યારે સુરેશની લોહીલુહાણ હાલતમાં હત્યા કરાયેલી હાલતમાં લાશ મળી આવતા તેની સાથે ઓરડીમાં રહેતો મિત્ર ક્યાંય જોવા મળ્યો નહોતો. જેથી સુરેશને તેના સાથીદાર સાથે કોઈ કારણોસર ઝઘડો થયો હોવાથી વહેલી સવારે જ ઢીમ ઢાળી દીધું હોવાનું દૃઢ શંકા છે.

બે હથિયાર પણ મળી આવ્યા
હાલ આજીડેમ પોલીસે મૃતદેહનું ફોરેન્સિક પોસ્ટમોર્ટમ કરાવવા માટે સિવિલ હોસ્પિટલમાં ખસેડવામાં આવ્યો છે. સાથે જ પોલીસે મૃતકના ભાઈ મહેન્દ્ર અને ભરતસિંહનું નિવેદન લેવા તજવીજ શરું કરી છે. તેમજ બનાવ સ્થળેથી પત્થર અને બે હથિયાર પણ મળી આવ્યા છે જે કબ્જે કરી એફએસએલમાં મોકલવામાં આવશે. અને ફરાર થયેલા મૃતકના રુમમાં સાથે રહેતા પ્રશાંતને પકડવા પોલીસે અલગ અલગ ટીમો બનાવી છે.