ફેંકી રેકોર્ડ કર્યો:કુંડલિયા કોલેજની વિદ્યાર્થિનીએ 10.08 મીટર ગોળો ફેંકી રેકોર્ડ કર્યો

સૌરાષ્ટ્ર યુનિવર્સિટીના સરદાર પટેલ સ્પોર્ટ્સ કોમ્પ્લેક્સમાં શુક્રવારથી ખેલકૂદ રમતોત્સવનો પ્રારંભ થયો છે. રમતોત્સવના પહેલા જ દિવસે રાજકોટની વિદ્યાર્થિનીએ ગોળાફેંક સ્પર્ધામાં 30 વર્ષ જૂનો રેકોર્ડ તોડ્યો હતો.ગોળાફેંક બહેનોનો જૂનો રેકોર્ડ 09.49 મી. મકવાણા કીર્તિબેનના નામે હતો.

જે 30 વર્ષ બાદ તોડી જે. જે. કુંડલિયા કોમર્સ કોલેજની વિદ્યાર્થિની પાદરિયા ખુશીબેને નવો રેકોર્ડ 10.08 મી. સ્થાપિત કર્યો છે. 100મી, 200મી, 400મી, 800મી, 1500મી, 2000મી, 10,000મી, 110મી હર્ડલ્સ, 400 મી. હર્ડલ્સ, હાઈ જમ્પ, ત્રિપલ જમ્પ, શોટપુટ, ચક્ર ફેંક, હેમર થ્રો, જવેલીન થ્રો, 4 × 100 રીલે અને 4 x 400મી રીલે માં ભાઈઓ તથા બહેનોની 19 જેટલી ઇવેન્ટ રમાડાઇ છે જેમાં 75 જેટલી કોલેજોએ ભાગ લીધો હતો.

આ રમતોત્સવમાં 10 હજાર મીટર બહેનોમાં પાટડિયા ભાર્ગવી, ભાઈઓમાં સરવૈયા જયેશ પહેલા નંબરે વિજેતા થયા હતા. જ્વેલીન થ્રોમાં બહેનોમાં રંગાણી દ્દષ્ટિ અને ભાઈઓમાં ધોરિયા વિજય પ્રથમ નંબરે રહ્યા હતા. 100 મીટર દોડમાં ભાઈઓમાં ચોવટિયા હેન્સી જયારે બહેનોમાં પટેલ ગાયત્રી પ્રથમ રહ્યા છે. હાઈ જમ્પમાં બારૈયા કાજલ, શોટ-પુટમાં પાદરીયા ખુશી પ્રથમ ક્રમે વિજેતા થયા છે.