ઘરપકડ:રંગોલીપાર્ક પાછળ જાહેરમાં દારૂ વેચતો શખ્સ 240 બોટલ સાથે ઝડપાયો

શહેરની ભાગોળે રંગોલીપાર્કની પાછળ ખરાબામાં જાહેરમાં દારૂ વેચી રહેલા શખ્સને પોલીસે 240 બોટલ દારૂ સાથે ઝડપી લીધો હતો. 150 ફૂટ રિંગ રોડ પર રંગોલીપાર્કની પાછળ સરકારી ખરાબામાં એક શખ્સ જેના હાથમાં સફેદ પાટો બાંધેલો છે અને તેણે ટોપી પહેરેલી છે તેવી માહિતી મળતાં તાલુકા પોલીસ સ્ટેશનના પીઆઇ જે.વી.ધોળા સહિતનો સ્ટાફ દોડી ગયો હતો. પોલીસ પહોંચી ત્યારે નિયત વર્ણનવાળો શખ્સ મળી આવ્યો હતો અને તે જ્યાં ઊભો હતો ત્યાંથી પોલીસને રૂ.1.20 લાખની કિંમતનો 240 બોટલ દારૂનો જથ્થો મળી આવ્યો હતો.

પોલીસે દારૂનો જથ્થો જપ્ત કરી સ્થળ પર હાજર રહેલા આમ્રપાલી ફાટક પાસેના અમરજીતનગરમાં રહેતા અનુપમ ઉર્ફે અનિલ ઇલ્ચટ હાલોરી (ઉ.વ.54)ને ઝડપી લીધો હતો. દારૂનો જથ્થો કોણ આપી ગયો હતો અન્ય કોઇની સંડોવણી છે કે કેમ સહિતની હકીકત જાણવા પોલીસે આરોપીને રિમાન્ડ પર લેવાની તજવીજ શરૂ કરી હતી. પુનિતનગર પાણીના ટાંકા પાસે ખુલ્લા પટમાં જુગાર રમાઇ રહ્યાની હકીકત મળતાં તાલુકા પોલીસ દોડી ગઇ હતી. પોલીસે મુન્ના વેરશી સોલંકી, લખમણ સાડમિયા, દામો શિવા વાજેલિયા, આકાશ જકશી પરમાર અને બાબુ ભૂપત સોલંકીને રૂ.31200ની રોકડ સાથે ઝડપી લીધા હતા. ટોળું વળીને જુગાર રમતાં હોય સોશિયલ ડિસ્ટન્સિંગ ભંગનો ગુનો પણ અલગથી નોંધ્યો હતો.