તપાસ:લેન્ડ ગ્રેબિંગના 9 કેસની તપાસ પ્રાંતને સોંપાઈ, કમિટીની પ્રથમ બેઠક કલેક્ટર કચેરીએ મળી

રાજ્યમાં લેન્ડ ગ્રેબિંગ પ્રિવેન્શન એક્ટ લાગુ થયો છે. કાયદા મુજબ સમયાંતરે લેન્ડ ગ્રેબિંગ પ્રિવેન્શન કમિટીની બેઠક બોલાવી કેસ અંગે ચર્ચા કરવાની હોય છે. જેમાં રાજકોટ જિલ્લાની પહેલી બેઠક બુધવારે મળી હતી જેમાં 9 કેસને જે તે વિસ્તારના પ્રાંત અધિકારીઓને તપાસ માટે સોંપવામાં આવ્યા છે.

જિલ્લા તેમજ શહેરમાં જ્યારે પણ જમીન પચાવવા અંગેની અરજી કે ફરિયાદ હશે તો તેમાં પ્રાંત અધિકારી સીધી તપાસ કરશે, પોલીસ કમિશનરેટ વિસ્તારમાં પણ પ્રાંત તપાસ કરશે ત્યારબાદ જો કેસમાં તથ્ય નીકળે તો કમિટીમાં કેસ મુકાશે અને પછી ફરિયાદ દાખલ થશે.

જિલ્લા કલેક્ટર રેમ્યા મોહનના જણાવ્યા અનુસાર જમીન એ રેવન્યૂનો મુદ્દો હોવાથી પ્રાંતને જવાબદારી સોંપાઈ છે જરૂર પડ્યે શહેર પોલીસને પણ સાથે રાખવામાં આવશે. હાલ જે 9 કેસ છે તે જે તે વિસ્તારના પ્રાંતને તપાસ અર્થે મોકલ્યા છે.પ્રથમ બેઠકમાં કલેક્ટર, અધિક કલેક્ટર તેમજ પ્રાંત અધિકારીઓ સહિતના અધિકારીઓ હતા, પોલીસ કમિશનર શહેરમાં ન હોવાથી ડીસીપી ઝોન 2એ હાજરી આપી હતી.