મનપાએ દબાણ હટાવ્યું’તું:705 મિલકતમાં માર્જિન-પાર્કિંગમાં ફરી દબાણ થયા

રાજકોટ મહાપાલિકાની ટાઉન પ્લાનિંગ શાખાએ શહેરના 21 રાજમાર્ગ પરની 705 મિલકતના માર્જિન-પાર્કિંગમાં રહેલા છાપરાં, ઓટલા, રેલિંગ વગેરે દબાણો દૂર કરીને 6745 ચોરસ મીટર પાર્કિંગ પ્લેસ ખુલ્લી કરાવાઈ હતી. બાદમાં ફરી આમાંથી મોટાભાગના સ્થળોએ દબાણ થઇ ગયા છે. જેના કારણે શહેરીજનોને રાજમાર્ગો પર વાહન પાર્ક કરવા પડે છે. પોલીસ આ વાહનો ટોઇંગ કરી જાય છે.

કોર્પોરેશનના બજેટમાં અનેક વખત મલ્ટિ લેવલ પાર્કિંગના આયોજન મુકાયા છે. જેમાં કોઠારિયા નાકા, ત્રિકોણબાગ સહિતના સ્થળે મલ્ટિ લેવલ પાર્કિંગના આયોજન તૈયાર કરાતા હતા, પરંતુ એકેય વખત આ યોજના ફાઇનલ થઇ નથી. મહાનગરપાલિકાની ટાઉન પ્લાનિંગ શાખાએ વિવિધ મિલકતોના માર્જિન પાર્કિંગની જગ્યામાંથી દબાણો દૂર કરવા કાર્યવાહી કરાય છે, પરંતુ કાર્યવાહી કર્યાના ગણતરીના દિવસોમાં જ ફરી દબાણો ખડકાઈ જાય છે. મનપાએ યુનિ. રોડ, કુવાડવા રોડ, 150 ફૂટ રોડ, કોઠારિયા, રેસકોર્સ રિંગ રોડ, સંતકબીર રોડ, યાજ્ઞિક રોડ, કાલાવડ રોડ, સરદારનગર, ભાવનગર રોડ, રૈયારોડ, જવાહર રોડ, મવડી રોડ, ઢેબર રોડ વગેરે સ્થળો પર દબાણો દૂર કર્યા હતા.