ભાસ્કર બ્રેકિંગ:H3N2 રિપોર્ટના રૂ.4500, હવે ભાવ બાંધણું આવશે

કોરોના બાદ હવે સિઝનલ ફ્લૂના નવા વેરિયન્ટ H3N2ને લઈને લોકોમાં જાગૃતિ આવે તે માટે તંત્ર મહેનત કરી રહ્યું છે. જોકે આ રોગચાળામાં પણ કેટલીક ખાનગી લેબોરેટરીએ કમાણીની તક શોધી લીધી છે અને અમુક તબીબોના આધારે નિયમ વિરુદ્ધ ટેસ્ટિંગ કરીને રિપોર્ટ દીઠ 4500થી 5500 રૂપિયા તોડી રહી છે. આ પ્રવૃત્તિને લઈને હવે સિઝનલ ફ્લૂના ટેસ્ટ માટે ભાવ બાંધણું કરીને ઉઘાડી લૂંટ પર નિયંત્રણ લાવવાનું નક્કી કરાયું છે.

ખાનગી લેબોરેટરીએ કમાણીની તક શોધી લીધી
H3N2ના કેસમાં સીધા કોઇ પણના ટેસ્ટ કરી શકાતા નથી. સૌથી પહેલા કોરોના અને H1N1ના ટેસ્ટ કરાય છે અને સારવાર કરાય છે. જો દર્દી ગંભીર હોય અથવા તો કેટેગરી સી એટલે કે અગાઉથી કેન્સર, એઈડ્સ કે ઓર્ગન ફેઈલ્યોરની બીમારી હોય હાઈરિસ્ક ડિલિવરી હોય તે જ કેટેગરીના દર્દીના સેમ્પલ ટેસ્ટિંગ માટે મોકલવાના છે જો ખાનગી લેબ કે ખાનગી હોસ્પિટલમાં આવા દર્દી હોય તો સેમ્પલ મોકલીને તેની જાણ લગત આરોગ્ય તંત્રને કરવી તેવી ગાઈડલાઈન કેન્દ્ર સરકારે નક્કી કરી છે.

રિપોર્ટ દીઠ 4500થી 5500 રૂપિયા લેવામાં આવે
આ નિયમનું પાલન માત્ર સરકારી હોસ્પિટલમાં જ થતું હોય તેવી સ્થિતિ છે કારણ કે ખાનગીમાં બેફામ ટેસ્ટ થઈ રહ્યા છે. ખાનગી હોસ્પિટલમાં જે પણ દર્દી નિદાન માટે જાય અને હળવા લક્ષણો હોય તો પણ H3N2ના રિપોર્ટનો આગ્રહ કરાય છે અને ખાનગી લેબમાં મોકલી દેવાય છે અને ત્યાં રિપોર્ટ દીઠ 4500થી 5500 રૂપિયા લેવામાં આવે છે. આ દર્દી કેટેગરી સી માં આવતું ન હોવાથી આ ટેસ્ટના કોઇ પણ રેકોર્ડ મનપાની આરોગ્ય શાખા કે જિલ્લા આરોગ્ય વિભાગને મોકલાતા નથી તેથી જો કોઇ કેસ પોઝિટિવ હોય તો પણ તંત્રને ધ્યાને આવતું નથી.

લોકોના પૈસાનો વ્યય અટકાવવા માટે ટેસ્ટના ભાવ બાંધણા કરવાનો નિર્ણય
​​​​​​​આ ગંભીર બેદરકારી માત્રને માત્ર ખાનગી લેબ ટેસ્ટમાંથી વધુ પડતી કમાણી અને મેડિકલ માફિયાઓને કમિશન ચૂકવવા માટે કરી રહી છે તેવી બૂમ ઉઠતા આરોગ્ય વિભાગ સાબદું થયું છે અને ખોટા ટેસ્ટ મારફત થતા લોકોના પૈસાનો વ્યય અટકાવવા માટે ટેસ્ટના ભાવ બાંધણા કરવાનો નિર્ણય કરાયો છે. આ માટે મેડિકલ કોલેજના 3 માઈક્રોબાયોલોજિસ્ટ સહિત કુલ 5 માઈક્રોબાયોલોજિસ્ટની ટીમ બનશે જે ભાવ નક્કી કરશે અને આરોગ્ય વિભાગ હુકમ કરશે. અધિક નિયામક નિલમ પટેલે જણાવ્યું હતું કે, બેઠકમાં ચર્ચા બાદ સી કેટેગરીના દર્દીના સેમ્પલ લેવા જ સૂચના અપાઈ છે. નિયમભંગ કરનાર સામે કાર્યવાહી અંગે સરકારમાંથી મંજૂરી આવ્યા બાદ પગલાં લેવાશે.

ખાનગી હોસ્પિટલના દર્દીઓના ટેસ્ટ સિવિલમાં કરાઈ તો લૂંટ બંધ થાય
દર્દીને સામાન્ય લક્ષણ હોવા છતાં કેટલાક તબીબ બેફામ ટેસ્ટ કરાવી રહ્યા છે. આ ઉઘાડી લૂંટ રોકવાનો સૌથી શ્રેષ્ઠ ઉપાય સિવિલ હોસ્પિટલમાં ટેસ્ટ કરવાનો છે. અત્યારે ખાનગી હોસ્પિટલમાં કોઇને ટેસ્ટ કરવાનું કહેવામાં આવે તો તે ટેસ્ટ ખાનગીમાં જ થાય છે તે ફાઈલ લઈને સિવિલમાં જાય તો ટેસ્ટ કરાતા નથી પણ તેણે સિવિલની ફાઈલ કઢાવી ત્યાંના તબીબ પાસે તપાસ કરાવી જો તે તબીબ લખી દે તો જ ટેસ્ટ કરી શકાય છે. તેને બદલે ખાનગી હોસ્પિટલના તબીબે લખેલા પ્રિસ્ક્રિપ્શન પર વિનામૂલ્યે ટેસ્ટ કરવાની છૂટ આપવાની જરૂરિયાત છે આ કારણે ખાનગી લેબમાં ઉઘાડી લૂંટ પર અંકુશ આવશે અને ખરેખર કેટલા તબીબો ટેસ્ટ માટે આગ્રહ રાખે છે તે પણ સ્પષ્ટ થઈ શકે છે. સ્વાઈન ફ્લૂની મહામારી હતી ત્યારે ખાનગી હોસ્પિટલમાંથી આવતા સેમ્પલ સીધા જ સિવિલમાં મોકલી શકાતા હતા અને દર્દીઓ પર ખોટા ખર્ચનું ભારણ આવતું ન હતું.

નિયમ ભંગ કરનાર સામે કાર્યવાહી
કેટેગરી સી સિવાયના દર્દીઓના બેફામ ટેસ્ટ થાય છે તેના વિરુદ્ધ એપેડેમિક એક્ટ મુજબ કાર્યવાહી થાય તો ખોટી કમાણી કરતા તત્ત્વોને અટકાવી શકાય. આ અંગે આરોગ્યના સૂત્રોએ જણાવ્યું હતું કે, સરકારમાંથી મંજૂરી બાદ નિયમભંગ કરનાર સામે પગલાં લેવામાં આવશે.