ધરપકડ:એડવોકેટ સહિતના લોકો પાસે ક્રિપ્ટોના નામે રોકાણ કરાવી સુરતના 4 ચીટરે કરોડોની છેતરપિંડી આચરી

રાજકોટએક મહિનો પહેલા
  • કૉપી લિંક
આરોપી બ્રિજેશ અને કિરણ - Divya Bhaskar
આરોપી બ્રિજેશ અને કિરણ
  • લોભામણી લાલચ આપતા એડવોકેટે તેના મિત્રો અને પરિચિતોને પણ રોકાણ કરાવ્યું
  • રાજકોટના એડવોકેટે કરેલા રોકાણ સામે નજીવી રકમ પરત આપી: બે આરોપી ઝડપાયા

ક્રિપ્ટો કરન્સીના નામે રોકાણની આકર્ષક સ્કીમ આપી રાજકોટના એડવોકેટ સહિત અનેક લોકો પાસે કરોડો રૂપિયાનું રોકાણ કરાવી સુરતના ચાર શખ્સે છેતરપિંડી આચરી હતી, પોલીસે બે શખ્સને ઝડપી લીધા હતા જ્યારે અન્ય એક આરોપી દુબઇ નાસી ગયા હતા. યુનિવર્સિટી રોડ પરના જલારામ પ્લોટમાં રહેતા એડવોકેટ મહેન્દ્રભાઇ દાદભાઇ વાળા (ઉ.વ.48)એ છેતરપિંડી વિશ્વાસઘાત અંગે ક્રાઇમ બ્રાંચમાં નોંધાવેલી ફરિયાદમાં આરોપી તરીકે સુરતના બ્રિજેશ જગદીશચંદ્ર ગડિયાલ, કિરણ વનમાળીદાસ પંચાસરા, ધવલ લહેરી અને હિતેશ ગુપ્તાના નામ આપ્યા હતા.

મહેન્દ્રભાઇ વાળાએ ફરિયાદમાં જણાવ્યું હતું કે, 17 સપ્ટેમ્બર 2020ના તેમના મિત્ર મુન્ના બાવળિયાના સંપર્કથી ફૂલછાબ પાસેની એક હોટેલમાં કિરણ પંચાસરા અને ધવલ લહેરીને મળ્યો હતો, સુરતના બંને શખ્સે પોતાની ઓળખ ક્રિપ્ટો કરન્સીમાં કામ કરતા હોવાનું કહી તેમની ટ્રોનથી ઓળખાતી ક્રિપ્ટો કરન્સીમાં રોકાણ કરવા કહ્યું હતું અને રોકાણ પર 150 દિવસ સુધી 2 ટકા વળતરની ખાતરી આપી હતી, એડવોકેટ વાળાએ રૂ.4 હજારનું રોકાણ કરી 2000 ટ્રોન ખરીદ કર્યા હતા, આરોપીઓએ રોકાણ થતાં જ એક એપ્લિકેશન ડાઉનલોડ કરાવડાવી હતી અને તેમાં મહેન્દ્રભાઇનું એકાઉન્ટ ખૂલી ગયું હતું જેમાં તેમણે ખરીદેલા 2000 ટ્રોન દેખાતા હતા.

ત્યારબાદ ચીટર ગેંગે લાલચ આપી હતી કે, તમે રોકાણકાર લાવશો તો 20 ટકા વળતરની ખાતરી આપી હતી, મહેન્દ્રભાઇ હોટેલમાં તેના મિત્ર વિક્રમસિંહ જાડેજાને લઇ ગયા હતા અને વિક્રમસિંહે પણ 10 હજારનું રોકાણ કર્યું હતું. ત્યારબાદ મહેન્દ્રભાઇએ તેમના પરિચિત મયંકભાઇ પંડ્યા, વિક્રમસિંહ જાડેજા, અનિલભાઇ જાની, જયદેવભાઇ પીપળિયા, વિક્રમસિંહ રાઠોડ, પરાગભાઇ રૂપારેલ પાસે રોકાણ કરાવડાવ્યું હતું.

એડવોકેટ મહેન્દ્રભાઇએ રૂ.52,20,100 રોકાણ કર્યું હતું, જ્યારે તેમના દ્વારા રોકાણ થયેલી રકમનો આંક કરોડો સુધી પહોંચતી હતી, નાણાંની જરૂરિયાત ઊભી થતાં મહેન્દ્રભાઇએ પૈસાની ઉઘરાણી કરતાં આરોપીઓએ કટકે કટકે રૂ.13.90 લાખ પરત આપ્યા હતા, બાકીની રકમ રૂ.38,30,100નું ટ્રોનમાંથી મેગાટ્રોનમાં રોકાણ કરાવડાવી દઇ ત્યારબાદ મેગાટ્રોનની કિંમત ઝીરો કરાવડાવી આરોપીઓ રોકાણકારોની રકમ હજમ કરી ગયા હતા.

દીવ, ગોવાની હોટેલમાં બોલવાતા
સુરતના ચારેય ચીટરોએ પોતાની ઓનલાઇન પેઢી બનાવી ક્રિપ્ટો કરન્સીના નામે લોકોને આકર્ષક સ્કીમ આપી રોકાણ કરવા ફસાવ્યા હતા, રોકાણકારોને આકર્ષવા માટે ચીટર ગેંગ દીવ, ગોવા અને રાજસ્થાનની નામાંકિત હોટેલમાં મિટિંગ રાખતા હતા અને ત્યાં રોકાણકારોને બોલાવી તેમનો તમામ ખર્ચ પોતે ઉઠાવતા હતા, પોતે સાચી જગ્યાએ રોકાણ કરી રહ્યા છે તેવો વિશ્વાસ અપાવી ચીટર ગેંગ દર વખતે આરોપીઓને વધુ રોકાણ કરવા ફસાવતા હતા.

અજાણી વ્યક્તિને મર્સિડિઝની ચાવી આપી
ઉદયપુરની હોટેલમાં મેગાટ્રોન ક્રિપ્ટો કરન્સી લોન્ચ નામે કાર્યક્રમ યોજવામાં આવ્યો હતો જેમાં રોકાણકારોને બોલાવવામાં આવ્યા હતા. ચારેય ચીટરોએ રોકાણકારોને કહ્યું હતું કે, જે લોકો દશ દિવસમાં 8 કરોડનું રોકાણ કરશે તેને મર્સિડિઝ બેન્ઝ કાર આપવામાં આવશે, આવી જાહેરાત કર્યા બાદ એક અજાણી વ્યક્તિને સ્ટેજ પર બોલાવવામાં આવ્યો હતો અને તેને મર્સિડિઝ કારની ચાવી આપવામાં આવી હતી, ખરેખર કોઇ રોકાણકારને ચાવી આપવામાં આવી હતી કે રોકાણકારોને છેતરવા નાટક કર્યું હતું.

અન્ય સમાચારો પણ છે...