લોકડાઉન 3:યુપી, બિહાર અને એમપીના 3 હજાર શ્રમિક માટે 3 ટ્રેન દોડાવી, મેડિકલ તપાસ કરી રવાના કરાયા: ફૂડ પેકેટ પણ આપ્યા

રાજકોટ રેલવે સ્ટેશનમાં યાત્રિકોની અવરજવર શરૂ થઇ છે, પરંતુ આ યાત્રિકો શ્રમિકો છે જેમને જિલ્લા વહીવટી તંત્ર દ્વારા તેમના વતન મોકલવા માટેની વ્યવસ્થા કરવામાં આવી રહી છે. રવિવારે રાજકોટ સ્ટેશનથી એક જ દિવસમાં ત્રણ ટ્રેનમાં અંદાજિત 3 હજારથી વધુ શ્રમિકોને પોતાના વતન મોકલાયા હતા. રાજકોટથી સવારે 8.40 કલાકે બિહારની ટ્રેન 1228 શ્રમિક સાથે રવાના થઇ, 11.45 કલાકે બલિયા (ઉત્તરપ્રદેશ) 1130 શ્રમિક ગયા. રાત્રે 10 કલાકે રતલામ (મધ્યપ્રદેશ) માટેની ટ્રેન દોડાવાઈ હતી. રાજકોટથી શ્રમિકોને વતન મોકલતા પહેલા શ્રમિકોની મેડીકલ તપાસ કરાઈ હતી. શ્રમિકોને જમવા માટે ફૂડ પેકેટ પણ અપાયા હતા.

મોરબી, સુરેન્દ્રનગર, જામનગરથી ટ્રેન દોડાવી
શ્રમિકોને તેમના વતન મોકલવા માટે રાજકોટ સ્ટેશન ઉપરાંત રાજકોટ રેલવે ડિવિઝનમાં આવતા મોરબી, સુરેન્દ્રનગર અને જામનગર સ્ટેશન પરથી પણ શ્રમિક સ્પેશિયલ ટ્રેન દોડાવી હતી. રવિવારે સવારે 7:30 કલાકે મોરબીથી ભોપાલ (મધ્યપ્રદેશ) ટ્રેનમાં 1181 શ્રમિક મોકલાયા હતા. જ્યારે રાત્રે 11 કલાકે શાહજહાંપુર (ઉત્તરપ્રદેશ) ટ્રેનમાં 1200થી વધુ શ્રમિકો ગયા હતા. એવી જ રીતે સુરેન્દ્રનગરથી કાસગંજ (ઉત્તરપ્રદેશ)ની ટ્રેન સાંજે 5 કલાકે 1125 શ્રમિકો સાથે રવાના કરાઈ હતી. જામનગરથી રાત્રે 8:05 કલાકે શાહજહાંપુર (ઉત્તરપ્રદેશ)ની ટ્રેન 1616 શ્રમિકો સાથે રવાના થઇ હતી.