આરોગ્ય સાથે ચેડા:રાજકોટમાંથી વધુ 2 બોગસ ડોક્ટર ઝડપાયા,બન્ને માત્ર 12 કોમર્સ પાસ પણ બની ગયા ડોકટર, પોલીસે ધરપકડ કરી

રાજકોટ8 મહિનો પહેલા
  • કૉપી લિંક
બોગસ ડોક્ટર સંજય દવે (ડાબી તરફ) અને અનિષ લીંગડીયા (જમણી તરફ) - Divya Bhaskar
બોગસ ડોક્ટર સંજય દવે (ડાબી તરફ) અને અનિષ લીંગડીયા (જમણી તરફ)
  • હજુ 3 દિવસ પહેલા SOGએ નકલી ડોક્ટરની ધરપકડ કરી હતી
  • દવા-ઇન્જેકશન્સ, બ્લડપ્રેશર માપવાના સાધનો અને રોકડ સહિતનો મુદામાલ કબ્જે

રાજકોટ શહેર અને જિલ્લામાં કોરોનાની બીજી ઘાતક લહેરમાં અનેક લોકો સંક્રમણ થયા બાદ રાહત જોવા મળી રહી છે. બીજી તરફ ચોમાસાની ઋતુ નજીક આવતા સામાન્ય શરદી ઉધરસ અને તાવના કેસોમાં પણ વધારો જોવા મળી રહ્યો છે. આ બધા વચ્ચે લોકોના સ્વાસ્થ્ય સાથે ચેડા કરતા બોગસ ડોકટરનો પોલીસ ધરપકડ કરી રહી છે. હજુ 3 દિવસ પહેલા રાજકોટ SOG પોલીસે એક ડિગ્રી વગરના ડોક્ટરને ઝડપી પાડ્યો હતો ત્યાં આજે ફરી આજીડેમ પોલીસે રણુજાનગર અને લોઠડા ગામેથી બે નકલી ડોકટરને પકડી પાડ્યા છે. જેમાં એક શખ્સ તો સતત બીજીવાર આ ગુનામાં પકડાયો છે. બંનેમાં સામ્યતા એ છે કે બંને ધોરણ-12 કોમર્સ ભણેલા છે. અગાઉ અલગ અલગ હોસ્પિટલોમાં કામ કર્યુ હોઇ તેના અનુભવને આધારે લોકોના આરોગ્ય સાથે ચેડા કરવાનું શરૂ કરી દીધું હતું.

કોઈ પણ જાતની મેડિકલ ડિગ્રી વગર પ્રેક્ટિસ કરતા હતા
આ અંગે આજીડેમ પોલીસ મથકની ટીમોને બાતમી મળી હતી કે રણુજાનગર શેરી નં.5/6ના ખુણે બ્રહ્માણી હોલ સામે કોઠારીયા રોડ પર સંજય ભાનુશંકરભાઇ દવે કોઇપણ જાતની ડિગ્રી ન હોવા છતાં દવાખાનુ ખોલીને બેઠો છે. તેના આધારે ત્યાં દરોડો પાડવામાં આવતાં સંજય દવે ગળામાં સ્ટેથોસ્કોપ ટીંગાડી ખુરશીમાં બેઠેલો જોવા મળ્યો હતો. 16*16ની જગ્યામાં પેશન્ટને સુવડાવવાના ટેબલની વ્યવસ્થા પણ હતી. તેમજ અલગ અલગ તબિબી સાધનો, દવાઓ, બાટલાઓનો જથ્થો હતો.પોલીસે ઓળખ આપી ડીગ્રી માંગતા સંજયએ ગલ્લા તલ્લા કર્યા બાદ કોઇ ડીગ્રી નહિ હોવાનું અને પોતે માત્ર ધોરણ-12 કોમર્સ સુધી ભણ્યો હોવાનું કહેતાં તેની સામે કાર્યવાહી કરી ધરપકડ કરી દવાઓ સહિતના સાધનો અને રોકડા રૂ.1840 કબ્જે કરાયા હતાં.

પોલીસે મુદ્દામાલ જપ્ત કર્યો
આ ઉપરાંત લોઠડામાં દેવપરાના અનિષ લીંગડીયા કલીનીક ખોલીને બેસી ગયો હતો જેની બાતમી મળતા પોલીસે તેની ધરપકડ કરી હતી અને દવા-ઇન્જેકશન્સ, બ્લડપ્રેશર માપવાના સાધનો, સ્ટેથોસ્કોપ, થર્મોમીટર, કાતરો, ગ્લુકોઝના બાટલા, ડાયાબીટીશ માપવાના સાધન, કફ શીરપ, રોકડ સહિતનો મુદ્દામાલ જપ્ત કર્યો હતો ઉલ્લેખનિય છે કે આરોપી બોગસ ડોકટર 12 ધોરણ સુધી અભ્યાસ કરી બાદમાં અલગ અલગ ક્લિનિક માં કમ્પાઉન્ડર તરીકે કામ કરેલ છે જે બાદ છેલ્લા બે વર્ષથી ક્લિનિક ચલાવી જાતે સારવાર કરતો હોવાનું પોલીસ તપાસમાં સામે આવ્યું છે.

ભારતનગરમાં કિલનિક ચલાવતા મનોજ ધીરનાથ ઠાકુરની પણ પોલીસે ધરપકડ કરી હતી. માન્ય ડિગ્રી વગર પ્રેક્ટિસ કરતો હતો.