મુસાફરોમાં ભારે હાલાકી:રાજકોટ-ગોંડલ ST બસનો વાયા કોટડાસાંગાણી રૂટ 8 માસથી બંધ

કોટડાસાંગાણી રૂટની એસ ટી બસને છાસવારે બંધ કરી દેવાતા મુસાફરોને હાલાકી પડી રહી છે. ત્યારે રાજકોટથી સવારે આઠ વાગે ઉપડતી રાજકોટ ગોંડલ વાયા કોટડાસાંગાણી થઈને ચાલતી બસ રૂટને આઠેક મહીનાથી વાયા કોટડાસાંગાણી બંધ કરી દેતા મુસાફરો ભારે હાલાકી ભોગવી રહ્યા છે. તેમા પણ રાજકોટથી કોટડાસાંગાણી સહીત આસપાસના ગામડાઓમા નોકરી અર્થે આવતા કર્મચારીઓને મુશ્કેલી પડી રહી છે.

એક તરફ સરકાર દ્વારા છેવાડાના માનવી સુધી એસ ટી બસ પહોંચે તે માટેના યથાર્ત પ્રયાસો કરવામાં આવે છે. પરંતુ બે જવાબદાર અધિકારીઓને આ અંગે કંઈજ પડી ન હોઈ તે મુજબ હંમેશા કોટડાસાંગાણી સાથે જ અન્યાય કરાતો હોવાનુ મુસાફરો જણાવી રહ્યા છે. રાજકોટ ગોંડલ વાયા કોટડાસાંગાણીની બસને આઠેક મહિનાથી વાયા કોટડાસાંગાણી કેન્સલ કરી નાખતા મુસાફરો ભારે મુશ્કેલીમા મુકાયા છે અને લોકોને ના છુટકે અન્ય વાહનોમા જવાની ફરજ પડે છે.

રૂટ શરૂ કરવા પ્રયાસ થશે
લોકડાઉનના હિસાબે બસના રૂટ બંધ કરાયા હતા. પરંતુ હાલ ધીમે ધીમે ચાલુ કરાઈ રહ્યા છે. અત્યારે અમુક બસો બંધ છે. આ અંગે વિભાગીય કચેરીને જાણ કરીને આ બસનો રૂટ શરૂ કરાઈ તેવા પ્રયાસો કરવામાં આવશે. > જે. આર.અગ્રાવત , ગોંડલ એસ ટી ડેપો મેનેજર