આપઘાત:યુવતીએ પાડોશી પિતા-પુત્રોની ધમકીથી કંટાળી એસિડ પીધું, મોત

જેતપુરનાં અમરનગરમાં સરકારી હોસ્પિટલ સામે રહેતાં પ્રભાબેન બાબુભાઈ મકવાણા (ઉ.વ.૬૫) નામનાં વૃદ્ધાએ જેતપુર તાલુકા પોલીસ મથકમાં નોંધાવેલી ફરિયાદમાં આરોપી તરીકે પાડોશમાં રહેતાં જેન્તી બચુભાઈ મકવાણા તેમજ તેનાં બે પુત્ર સાગર અને ગોટિયાનું નામ આપ્યું છે.ફરિયાદનો દિકરો શૈલેષ તેમનાં પાડોશમાં રહેતાં જેન્તીભાઈ મકવાણાની દિકરીને અઢી મહિના પહેલાં ભગાડી ગયો હોય જે બાબતે પોલીસ ફરિયાદ થતાં હાલ શૈલેષ જેલમાં છે.પરંતુ આ બાબતોનો ખાર રાખી આરોપીઓ વારંવાર ફરિયાદીની દિકરી ભારતીને ગાળો આપી જાનથી મારી નાખવાની ધમકી આપી તેમજ ભગાડીને લઈ જવાની ધમકીઓ આપતાં હતાં.

આરોપીઓના આવા ત્રાસથી કંટાળી ગત તા. ૪ ફેબ્રુઆરીનાં રોજ રાત્રીનાં ઘરનાં અન્ય સભ્યો સુઈ ગયાં હતાં ત્યારે ભારતીએ એસિડ ગટગટાવી લીધું હતું. બાદમાં તેણીને સારવાર માટે હોસ્પિટલ ખસેડવામાં આવી હતી જયાં પણ તેણે પાડોશી પિતા-પુત્રનાં ત્રાસથી આ પગલું ભયૉનું જણાવ્યું હતું.દરમ્યાન તા. 6નાં રાત્રીના રાજકોટ સરકારી હોસ્પિટલમાં સારવાર દરમિયાન ભારતીનું મોત થયું હતું. આ મામલે તેની માતાએ જેતપુર તાલુકા પોલીસ મથકમાં ફરીયાદ નોંધાવતાં પોલીસે જેન્તી મકવાણા અને તેનાં બંને પુત્ર સાગર,ગોટીયા સામે ગુનો નોંધી કાયદેસરની કાયૅવાહી હાથ ધરી છે.