બેદરકારી:જસદણ નગરપાલિકાને આ લોડર ભંગાર સ્વરૂપે જોવાની ઉતાવળ!

જસદણ નગરપાલિકાને સરકાર દ્વારા નગર સાફ કરવા માટે લોડર ટ્રેક્ટર જેવા અનેક વાહનો આપવામાં આવતા હોય છે. પરંતુ નગર સાફ થાય કે ન થાય એ પહેલા જ આ લોડર ટ્રેક્ટર ધૂળધાણી થઈ જવા પામ્યું છે. જસદણ નગરપાલિકાને ગુજરાત સરકાર દ્વારા મેટાડોરથી લઈ કચરો ઉપાડવા માટે અનેક વાહનોની સવલત આપવામાં આવી છે. છતાં ન કચરો ઉપાડનાર મળ્યા કે ન તો આ લોડર ટ્રેક્ટરની સારસંભાળ કરનારા મળ્યા. જસદણ નગરપાલિકાને 2008 માં નવું નક્કોર ગુજરાત સરકાર દ્વારા લોડર ટ્રેક્ટર આપવામાં આવ્યું હતું. જેમને જેતે સમયે હારતોરા પહેરાવી લોડર ટ્રેક્ટરનું ઉષ્માભેર સ્વાગત પણ કરાયું હતું.

પરંતુ હાલ આ લોડર ટ્રેક્ટર ખંઢેરમાં ધકેલાઈ ગયેલી જૂની નગરપાલિકામાં પડ્યું પડ્યું સડી રહ્યું છે. આ લોડર ટ્રેક્ટરની કિંમત રૂ.6 થી 7 લાખ થવા જાય છે અને તે રકમનો કચ્ચરઘાણ બોલી ગયો છે. આજદિન સુધી આરુઠ અધિકારીઓ અને સત્તાધીશો અનેક વખત આ જગ્યાની સામું જોઈને જતા હોય છે. પરંતુ આ લોડર ટ્રેક્ટર ક્યારેય તેમને નજરમાં આવ્યું નથી. આ લોડર ટ્રેક્ટર શોભામાં અભિવૃદ્ધિ કરશે કે ભંગારની ભારોભાર વહેંચાશે તેતો આવનારો સમય જ બતાવશે