તમારા શહેરના લેટેસ્ટ સમાચાર અને ફ્રી ઈ-પેપર મેળવો

ડાઉનલોડ કરો

સમસ્યા:જસદણની રિજન્ટ સ્ટ્રીટમાં ગંદકીના ગંજ, દેશમાં સ્વચ્છ ભારત અભિયાન સફળ નીવડ્યું, પરંતુ અહીં ફિયાસ્કો

જસદણ10 દિવસ પહેલા
  • કૉપી લિંક

દેશમાં ભલે સ્વચ્છ ભારત અભિયાન સફળ નીવડ્યું હોય. પરંતુ જસદણમાં તો સ્વચ્છ ભારત અભિયાનનો ફિયાસ્કો જ જોવા મળી રહ્યો છે. જસદણ નગરપાલિકા તંત્ર પાસે સફાઈ કામદારોનો પુરતો સ્ટાફ પણ છે અને શહેરીજનો પાસેથી કરોડો રૂપિયાનો સફાઈ વેરો પણ વસુલ કરવામાં આવે છે. છતાં શહેરભરમાં ઠેરઠેર ગંદકીના ગંજ ખડકાયેલા જોવા મળી રહ્યા છે. જસદણના નગરજનો ગંદકીના ગંજ વચ્ચે પોતાનું જોખમી જીવન ગાળી રહ્યા છે.

છતાં નગરપાલિકા તંત્રના જવાબદારોના પેટનું પાણી પણ હલતું નથી. જસદણ શહેરની મધ્યમાં આવેલ રીજન્ટ સ્ટ્રીટ શેરી નં.1 માં કાયમી ગંદકીના ગંજ ખડકાયેલા જોવા મળતા હોવાથી નગરપાલિકા તંત્રની સફાઈ કામગીરીની પોલખોલ થઈ ગઈ હતી. એકબાજુ કોરોના જેવો જીવલેણ રોગચાળો ફૂંફાડો મારી રહ્યો છે. ત્યારે સ્થાનિક નગરપાલિકા તંત્ર ઉંઘતું ઝડપાયું હોવાથી નગરજનો ભારે મુંઝવણમાં મુકાઈ ગયા છે.

ભયંકર બદબૂથી વિસ્તાર ખદબદી ગયો
એકબાજુ જસદણ શહેરભરમાં રઝળતા ઢોરની સમસ્યા દિનપ્રતિદિન માથાના દુઃખાવા સમાન બની રહી છે. ત્યારે અધૂરામાં પૂરું સ્થાનિક નગરપાલિકા તંત્રની બેદરકારીના લીધે શહેરભરની શેરીઓ અને ગલીઓમાં સફાઈના અભાવે ગંદકીના ગંજ ખડકાયેલા જોવા મળી રહ્યા છે. જેના કારણે રસ્તે રઝળતા ઢોર પોતાના પેટનો ખાડો બુરવા માટે આવા ગંદકીના ગંજ નજીક અડ્ડો જમાવી બેસે છે. જેથી રાહદારીઓ અને વાહનચાલકોને ત્યાંથી પસાર થવું મુશ્કેલ બની ગયું છે. છતાં પણ લોકો પોતાના જીવના જોખમે અહીંથી પસાર થઈ રહ્યા છે.

અન્ય સમાચારો પણ છે...