ક્રાઈમ:ચણાના પાળામાં છુપાવેલી દારૂની 105 બોટલ કબજે, આરોપી ફરાર

થર્ટી ફર્સ્ટ નજીક આવતા બુટલેગરો સક્રિય થયા છે. ત્યારે પોલીસે પણ બુટલેગરો ઉપર તવાઈ હાથ ધરી છે. જો કે દારૂ છુપાવવા માટે બુટલેગરો અવનવા કિમીયાઓ કરતા હોય છે. ત્યારે આ વખતે વીંછિયા તાલુકાના આસલપુર ગામની સીમમાં ખેડૂતે દારૂની ખેતી કરી હોય તેમ ચણાના પાળામાં દારૂની બોટલો વાવી હતી. પરંતુ પોલીસને બાતમી મળી જતા દરોડો પાડી 105 બોટલો વિદેશી દારૂની બોટલો કિંમત રૂ.34 હજારનો દારૂ કબજે કરી, વાડી માલિકની શોધખોળ હાથ ધરી હતી. પ્રાપ્ત વિગતો મુજબ, વીંછિયા પોલીસ મથકના પીએસઆઈ ટી.એસ.રીઝવી સહિતનો સ્ટાફ પેટ્રોલિંગમાં હતો. જે દરમિયાન વીંછિયા તાલુકાના આસલપુર ગામે રહેતા સંજય ભવાનભાઈ જાદવે બોટાદ રોડ પર આવેલી પોતાની વાડીમાં ચણાના પાળામાં વિદેશી દારૂનો જથ્થો છુપાવ્યો હોવાની બાતમીના આધારે દરોડો પાડ્યો હતો. દરોડા દરમિયાન વીંછિયા પોલીસને વાડીમાં ચણાના પાળામાં છુપાવેલી વિદેશી દારૂની અલગ-અલગ બ્રાન્ડની 105 નંગ બોટલો રૂ.34,155 મળી આવતા પોલીસે દારૂનો જથ્થો કબજે કરી આરોપી વાડી માલિક સંજય ભવાન જાદવ વિરુદ્ધ ગુન્હો નોંધી તેની શોધખોળ હાથ ધરી હતી.