ઘરવાપસી:જામનગરથી 1200 શ્રમિકો વતન યુપી રવાના, તંત્રએ ફુડ પેકેટ, હેન્ડવોશ, પાણી, ફળ આપ્યા

કોરોના વાયરસના સંક્રમણને અટકાવવા લોકડાઉનની પરિસ્થિતિમાં રાજ્ય સરકાર દ્વારા રાજયના વિવિધ વિસ્તારોમાં કામ કરતા પરપ્રાંતીય શ્રમિકોને બસ અને હાલ ટ્રેન દ્વારા પોતાના વતન પહોંચવા માટેની વ્યવસ્થા કરવામાં આવી રહી છે. 

રેલ્વેની મુસાફરી દરમિયાન શ્રમિકોને બપોર તથા રાત્રીના ભોજનની  રેલ્વે તંત્ર દ્વારા વ્યવસ્થા
જામનગર જિલ્લામાં પણ દરેડ તેમજ શહેર સહિતના અન્ય વિસ્તારમાં કામ કરતા 1200 પરપ્રાંતિય શ્રમિકોને તેના પરિવારજનો સાથે  રવિવારે જામનગર રેલ્વે સ્ટેશનેથી રાત્રીના 8 કલાકે ઉતરપ્રદેશના શાહજહાંપુર ખાતે વતનમાં પરત ફરવા માટે જિલ્લા વહીવટીતંત્ર અને રેલવે વિભાગે ટ્રેનની વ્યવસ્થા કરી આપી હતી.અત્યાર સુધીમાં જામનગરથી કુલ ૪ શ્રમિક ટ્રેન રવાના થઇ ચૂકી છે. જેમાં ૩ ટ્રેન ઉત્તરપ્રદેશ માટે અને ૧ ટ્રેન બિહાર માટેની હતી.  દરેક કોચમાં સોશ્યિલ ડિસ્ટન્સીંગને ધ્યાને રાખીને શ્રમીકોને સમાવવામાં આવ્યા હતા. જામનગરથી મુસાફરી કરનાર તમામ શ્રમિકોને ફૂડ પેકેટ, પાણીની બોટલ, ફળ અને હેન્ડ વોશ માટે પેપર સોપ તેમજ બાળકો માટે ચોકલેટ, ક્રિમ બિસ્કીટ ફુડપેકેટ આપવામાં આવ્યા હતા. રેલ્વે તંત્ર દ્વારા સમગ્ર કોચને સેનીટાઈઝડ કરવામાં આવ્યા હતા. તેમજ રેલ્વેની મુસાફરી દરમિયાન શ્રમિકોને બપોર તથા રાત્રીના ભોજનની વ્યવસ્થા રેલ્વે તંત્ર દ્વારા આપવામાં આવશે.