પોલીસને ધંધે લગાડી:ભોજપરાના સરપંચે ફાયરિંગનું કહી પોલીસને દોડાવી, પછી ફેરવી તોળ્યું

ગોંડલ20 દિવસ પહેલા
  • કૉપી લિંક
  • ગાડીને ઓવરટેક કરવા મુદે થયેલી તકરારમાં પોલીસને ધંધે લગાડી

હાદસોં કા શહેર મનાતા ગોંડલમાં શનિવારના બપોરે 12 વાગ્યે નેશનલ હાઇવે પર ભોજપરાના સરપંચ પર નંબર પ્લેટ વગરની કારમાંથી ફાયરિંગ થયાની ઘટનાને લઇ સ્થાનિક પોલીસ અને એલસીબીએ તપાસના ચક્રો ગતિમાન કર્યા હતા, બાદમાં સરપંચે નિવેદનમાં પોતાના પર ફાયરિંગ થયું છે કે નહીં તે ખબર નથી પણ ફાયરિંગનો અવાજ આવ્યાનું જણાવી પોલીસ ફરિયાદ કરવાનું ટાળ્યું હતું. બન્ને વચ્ચે કાર ઓવરટેક કરવા મુદે ડખ્ખો થયો હોવાનું અને તેના લીધે પોલીસને ધંધે લગાડ્યાનું ફલિત થયું હતું.

ગોંડલ તાલુકા પીએસઆઇ ડી.પી. ઝાલાએ જણાવ્યું હતું કે શનિવાર બપોરે 12 વાગ્યે ભોજપરાના સરપંચ વિપુલભાઈ પરમારે પોતાના પર ફાયરિંગ થયું હોવાની પોલીસને જાણ કરતા પોલીસ કાફલો દોડી ગયો હતો અને તપાસ હાથ ધરી હતી. જેમાં ફાયરિંગ થયાનું કશું જોવા મળ્યું ન હતું. બાદ સરપંચ વિપુલભાઈએ એવી કેફિયત આપી કે પોતાને ઓવરટેક કરવા બાબતે સ્કોર્પિયો ગાડીના ચાલક સાથે ઝઘડો થયો હતો અને કહ્યું કે ફાયરિંગ જેવો અવાજ આવ્યો હતો, હકીકતમાં ફાયરિંગ થયું છે કે નહીં તે તેને ખ્યાલ નથી માટે તે બાબતે મારે ફરિયાદ કરવી નથી તેવું જણાવી યુધિષ્ઠિરની જેમ જ ‘ન રોવા કુંજરો વા’ કહેવત મુજબ વર્તન કરતાં મામલો થાળે પડી ગયો હતો.

અગાઉ ભોજપરા ગામના સરપંચ વિપુલભાઈ પરમાર તેમના પુત્રને બપોરે સ્કૂલે તેડવા માટે જઈ રહ્યા હતા, ત્યારે મુખી પેટ્રોલ પંપ નજીક કાળા કલરની નંબર પ્લેટ વગરની કારમાં ધસી આવેલા શખ્સે ફાયરિંગ કર્યું હતું અને પોતાનો ચમત્કારિક બચાવ થયો હોવાનું પોલીસને જણાવતાં તાલુકા પોલીસ, એલસીબી પોલીસ ઘટના સ્થળે દોડી ગઈ હતી અને આસપાસના સીસીટીવી ફૂટેજના આધારે તપાસના ચક્રો ગતિમાન કર્યા હતા. દિવસભર પોલીસ દોડતી રહી હતી અને બાદમાં દુધનું દૂધ અને પાણીનું પાણી થઇ જતાં પોલીસ સ્ટાફના શ્વાસ હેઠાં બેઠાં હતા.

અન્ય સમાચારો પણ છે...