ક્રાઈમ:પ્રેમલગ્ન કરનાર બહેનનું બે ભાઇએ ઘર સળગાવ્યું, ગોંડલની ઘટના: બે વર્ષ પૂર્વે મનપસંદ પાત્ર સાથે લગ્ન કરતા ભાઈઓએ દાઝ ઉતારી અને બહેનના સાસુ, સસરાને છરી ઝિંકી દીધી

ગોંડલ શહેરના વોરાકોટડા રોડ પર પ્રેમલગ્ન કરનાર બહેનના ઘરને બે યુવાનોએ નિશાન બનાવી જ્વલનશીલ પદાર્થ કાંડી ચાંપી દેતા બહેનનું ઘર ભડભડ સળગી ઉઠ્યું હતું. આટલેથી ન અટકી,બહેનના સાસુને છરી મારી સસરાને લમધારી નાખ્યા હતા. વોરાકોટડા રોડ પર પંચ પીરની દરગાહ પાસે રહેતા જીતુભાઈ કરસનભાઈ સોલંકીના પુત્ર દિનેશે બે વર્ષ પહેલા પાડોશમાં જ રહેતા મનસુખભાઇ ટપુભાઈ સોલંકી ની દીકરી મનીષા સાથે પ્રેમ લગ્ન કરી લીધા હોય જેનો ખાર રાખી મનીષાના બંને ભાઈ મંગલ મનસુખ ભાઈ સોલંકી તેમજ સુનિલ મનસુખ ભાઈ સોલંકી ઝઘડો કરવાના ઈરાદે પાઇપ અને છરી સાથે ધસી આવી મારામારી કરી બહેનના સાસુ ગીતાબેનના હાથમાં છરી મારી હતી.

અને જીતુભાઈને માર મારતા બંને પતિ-પત્ની ઘરની બહાર નીકળી ગયા હતા તેમ છતાં પણ ઉપરોક્ત શખ્સોને સંતોષ થયો ન હોય બહેનના ઘરને જ્વલનશીલ પદાર્થ છાતી કાંડી ચાંપી દેતા ઘર સળગી જવા પામ્યું હતું જેમાં ઘરની તમામ ઘરવખરી અને સુરતથી લાવેલો કાપડ નો માલ સામાન બળીને ખાખ થઇ ગયો હતો. ફરિયાદ નોંધાવાતા પોલીસે આરોપીઓ વિરૂદ્ધ ગુનો નોંધ્યો હતો. જ્યારે સામાપક્ષે મંગલ મનસુખ ભાઈ સોલંકી, જીતુ કરસન સોલંકી, મહેશ જીતુ સોલંકી, દિનેશ જીતુ સોલંકી અને રોહિત જીતુ સોલંકી વિરુદ્ધ સમાધાન કરવા બોલાવી માર મારી ઇજા પહોંચાડતા પોલીસે ગુનો નોંધી કાર્યવાહી હાથ ધરી હતી.