બૂટલેગરોએ પ્યાસીઓની પ્યાસ બુઝાવવા નવો કીમિયો અપનાવ્યો:ગોંડલ ભરૂડી ટોલ નાકા પાસે ટ્રાવેલ્સ બસના પાર્સલમાંથી વિદેશી દારૂનો જથ્થો મળી આવ્યો

હોળીના તહેવાર નિમિત્તે સૌરાષ્ટ્રમાં વિદેશી દારૂની વ્યાપક માગ વધી હોવાથી બુટલેગરો નવા-નવા કીમિયા અપનાવી રહ્યા હોય અમદાવાદથી જામજોધપુર તરફ જતી ટ્રાવેલ્સની બસમાં પાર્સલ દ્વારા મંગાવવામાં આવેલા વિદેશી દારૂનો જથ્થો ગોંડલ ભરૂડી ટોલનાકા પાસે પોલીસે પકડી પાડી કાર્યવાહી હાથ ધરી હતી.

પ્રાપ્ત વિગતો મુજબ ગોંડલ તાલુકા પોલીસના શક્તિસિંહ મનુભા જાડેજા, છત્રપાલસિંહ જાડેજા, ગીરિરાજસિંહ જાડેજા, અમરદીપસિંહ જાડેજા, અજીતભાઈ ગંભીર સહિતના પોલીસ કર્મચારીઓએ પ્રાથમિકના આધારે ભરૂડી ટોલનાકા પાસે વોચ ગોઠવી હતી. દરમિયાન શંકાસ્પદ તુલસી ટ્રાવેલ્સ GJ-03-BT-2811 નંબરની બસ પસાર થતાં તેને અટકાવી તેની તલાસી લેતા તેમાંથી વિદેશી દારૂનો જથ્થો બોટલ નંગ 28 જેની કિંમત રૂ. 13,290 નો મળી આવતાં કબજે લઈ કાર્યવાહી હાથ ધરી હતી. પાર્સલ બીલટી નંબરનાં આધારે દારૂનો જથ્થો મંગાવનાર શખ્સોની શોધ શરૂ કરી હતી.