ફરિયાદ:ગોંડલમાં મસાલાના બે ગોડાઉનમાંથી રૂ.175000નું 84 મણ જીરું ઉઠાવી ગયા

હોળી ધૂળેટીના તહેવાર બાદ લોકો વાર્ષિક મરચું, ધાણાજીરું સહિતના મસાલાની ખરીદી કરતા હોય છે, તસ્કરોને પણ મસાલાની આવશ્યકતા પડી હોય ગુંદાળા રોડ પરના બે ગોડાઉનને નિશાન બનાવી 84 મણ જીરુ સાથે છકડો રીક્ષા મળી કુલ રૂ. 2,44,000 ની ચોરી કરી લઇ જતાં પોલીસ ફરિયાદ નોંધાઇ હતી.

પ્રાપ્ત વિગતો મુજબ શહેરના ગુંદાળા રોડ ઉપર આવેલ મહાવીર ધામ સોસાયટીમાં રહેતા અને માર્કેટિંગ યાર્ડમાં નિલેશ એન્ટરપ્રાઇઝના નામે દલાલીની દુકાન ચલાવતા નિલેશભાઈ જેરામભાઈ ઘેવરીયાના ગુંદાળા રોડ મેરી સ્કૂલ સામે આવેલા હિતેશભાઈ કરસનભાઈ વસંતના ભાડાના ગોડાઉનમાં તસ્કરોએ પરોણા કરી ગોડાઉન શટર ઊંચકી 54 મણ જીરુ કિંમત રૂપિયા 135000 ચોરી કર્યા પછી બાજુના સુભાષભાઈના ગોડાઉનમાંથી પણ 30 મણ જીરુ કિંમત રૂપિયા 39000 ચોરી કરી લઇ ગયા હતા.

આ ઉપરાંત ઉપરોક્ત બંને ગોડાઉનની બાજુમાં રહેતા પુંજાભાઈ દાનભાઈ મુછારની છકડો રીક્ષા GJ03 AX 3669 કિંમત રૂપિયા 70,000 ની ચોરી કરી લઇ જતાં પોલીસ ફરિયાદ નોંધાવતા પોલીસે અજાણ્યા તસ્કરો વિરૂદ્ધ ગુનો નોંધી તપાસ હાથ ધરી હતી.