ચોરી:આદિત્યાણામાં આંગણવાડી વર્કરના મકાને ચોર ત્રાટક્યા

પોરબંદર જિલ્લાના રાણાવાવ તાલુકામાં આવતા આદિત્યાણા ગામે રહેતા આંગણવાડી વર્કર બહેનના મકાને કોઇ અજાણ્યા ચોર ત્રાટક્યા હતા અને દાગીના સહિત રોકડ રકમ તથા બેંકબૂકોની ઉઠાંતરી કરી ચોરી કરી લઇ ગયાનો બનાવ સામે આવ્યો છે. આદિત્યાણા ગામના કાદીપ્લોટ વણકરવાસ વિસ્તારમાં રહેતા અને આંગણવાડી વર્કર તરીકેની નોકરી કરતા મુકતાબેન સુરેશભાઇ સાદિયાના રહેણાંક મકાનમાં ગઇ રાત્રીના સમય દરમ્યાન કોઇ અજાણ્યા ચોર ઘૂસ્યા હતા અને મકાનની ઓસરીનું તાળુ તોડીને

ઘરમાં પ્રવેશ્યા હતા અને ઘરના કબાટમાં રાખવામાં આવેલા સોનાનો નેકલેશ, વીંટી, ચાંદીના સદરા તથા જુદી જુદી બેંકના ખાતાની બેંકબૂકો તેમજ રોકડ રકમ સહિત કુલ રૂ.૭૮,૫૦૦/- જેટલી રકમની મતા ઉસેડી જઇ, ચોરી કરી લઇ ગયાનો બનાવ બનતા, મૂકતાબેને આ બાબતે પોલીસને જાણ કરી હતી, જેથી પોલીસે અજાણ્યા ચોર ઇસમ સામે ગુનો નોંધાયો હતો.