ઘડિયાળનું સમારકામ કરવા માંગ:પોરબંદરમાં આવેલા ઐતિહાસિક ત્રણ ઘડિયાળ ટાવર વર્ષોથી બંધ હાલતમાં

પોરબંદરમાં રાજાશાહી વખતના ટાવર આવેલા છે. જેનું યોગ્ય જતન નહીં થતા મોટાભાગના ટાવરો બંધ હાલતમાં જોવા મળે છે, આ ટાવરની ઘડીયાલના કાંટા થંભી ગયા છે તેને પૂર્વવત કરવામાં આવે તેવી માંગ શહેરીજનો કરી રહ્યા છે.

પોરબંદર શહેરમાં રાણીબાગ, માણેકચોક, સ્ટેટલાઈબ્રેરી સહિતના વિસ્તારોમાં રાજાશાહી વખતના ટાવરો આવેલા છે. આ ટાવરની ઘડીયાલો છાસવારે બંધ પડી જાય છે. અગાઉ નગરપાલિકાએ લાખો રૂપીયાનો ખર્ચ કરીને આ ટાવરોને જીવંત કર્યા હતા પરંતુ યોગ્ય જાળવણીના અભાવે હાલ આ ત્રણેય ટાવરો વર્ષોથી બંધ હાલતમાં જોવા મળી રહ્યા છે.

શહેરની શોભા ગણાતા ઐતિહાસિક ધરોહર એવા રાજાશાહી વખતના ટાવરોનું જતન કરવામાં નહીં આવતા આ ટાવરો હાલ શોભાના ગાંઠીયા સમાન બની ગયા છે જેને પગલે શહેરીજનોમાં નારાજગી જોવા મળી રહી છે. જેથી આ ધરોહર સમા ઘડીયાલના ટાવરો રીપેર કરાવી ફરીથી શરૂ કરવામાં આવે તેવી માંગ ઉઠી છે.