મુલાકાત:હરિયાણાના નાયબ મુખ્યમંત્રીએ કિર્તી - મંદિરની મુલાકાત લઈ ધન્યતા અનુભવી

હરિયાણાના નાયબ મુખ્યમંત્રીએ પોરબંદર ખાતે કીર્તિમંદિરની મુલાકાત લઈ ધન્યતા અનુભવી હતી. દિલ્હી ખાતે કૃષિબીલ અંગે ખેડૂતોનું આંદોલન જલ્દી પૂર્ણ થાય તેવી આશા વ્યક્ત કરી છે.

હરિયાણાના નાયબ મુખ્યમંત્રી દુસ્યંત ચૌટાલા વિમાનમાં પોતાના પરિવાર સાથે સોમવારે સવારે એરપોર્ટ પર આવી પહોંચ્યા હતા અને જમીનમાર્ગે તેઓ દ્વારકા જવા રવાના થયા હતા. દ્વારકા દર્શન કર્યા બાદ તેઓ પરત પોરબંદર આવ્યા હતા અને મહાત્મા ગાંધીજીના જન્મ સ્થળ ખાતે મુલાકાત લીધી હતી. તેઓએ જણાવ્યું હતું કે ગાંધીજીના જન્મ સ્થળની મુલાકાત લઈ ગૌરવની લાગણી સાથે ધન્યતાનો અનુભવ થયો છે. હરિયાણા, પંજાબના ખેડૂતોએ દિલ્હી ખાતે કૃષિબીલ અંગે આંદોલન છેડયું છે તે અંગે તેઓએ જણાવ્યું હતું સરકાર અને ખેડૂતો વચ્ચે ચર્ચા થાય અને આ આંદોલન વહેલી તકે પૂર્ણ થાય તેવી આશા રાખું છું. હરિયાણાના નાયબ મુખ્યમંત્રી પોતાના પરિવાર સાથે કેશોદ જવા રવાના થયા હતા અને સોમનાથ દર્શન કરવા જશે.