રજૂઆત:મહિયારીમાં વિવિધ પ્રશ્નોનું નિરાકરણ કરવા રજૂઆત

પોરબંદરના સાંસદ રમેશ ધડુક દ્વારા સિંચાઇ યોજનાના સચિવને રજૂઆત કરી એવું જણાવ્યું હતું કે મહિયારી ગ્રામ પંચાયતના ગ્રામજનો દ્વારા કરવામાં આવેલ રજૂઆત મુજબ આ ગામમાં આવેલ નદીમાં ગેટ વાળો પાળો બનાવવામાં આવે, જેથી દર વર્ષે ઉપરવાસના વિસ્તારમાંથી આવતું પાણી રોકી શકાય અને મીઠા પાણીનો વેડફાટ થતો પણ અટકાવી શકાય, મીઠા પાણીના કારણે હજારો ખેડૂતોને સિંચાઇનો લાભ મળી રહેશે.

નદી પર વર્ષો જૂનો ગેટ ખુબ જ જર્જરીત બની ગયો છે. જેથી આ ગેટ નવો બનાવવા આવે તે જરૂરી છે. દર વર્ષે વરસાદી પાણીનો વેડફાટ થઈ દરિયામાં વહી જાય છે. જેથી આ ગેટનું નવીનીકરણ કરવામાં આવે તો વેડફાટ થતું પાણી અટકી શકે છે. અને જર્જરીત પુલ નવો બનાવવામાં આવે તેવી પણ રજૂઆત કરાઇ હતી. પાણીનો વેડફાટ થતો અટકે તો આસપાસના ગ્રામ્ય પંથકના ખેડૂતોને પણ સિંચાઈ માટે ઉપયોગી નીવડી શકે તેમ છે. જેથી સત્વરે કાર્યવાહી કરવામાં આવે તેવી માંગ કરાઈ હતી.