ભાસ્કર ફોલોઅપ:શાર્કને ચારો આપવા ડોલ્ફિનનો શિકાર કર્યો; શાર્કના શિકાર માટે શખ્સો નિકળ્યા હતા

પોરબંદરના સમુદ્ર માંથી ડોલ્ફિનના શિકાર કરનાર ટોળકી ઝડપાઈ હતી જેના બોટ માંથી 22 ડોલ્ફિન સહિત 4 શાર્ક માછલીના મૃતદેહ મળી આવ્યા હતા. 10 શખ્સને 2 દિવસના રિમાન્ડ બાદ જેલ હવાલે કરવામાં આવ્યા છે. તામિલનાડુ ના શખ્સે આ શખ્સોને શાર્ક ના શિકાર માટે કોન્ટ્રાક્ટ આપી એડવાન્સ રૂ. 10 લાખ આપ્યા હતા. પોરબંદરના સમુદ્રમાં ગત તા. 15/3ના રોજ 12 નોટીકલ માઈલ દૂર ડાયના 2 નામની બોટ ફિશીંગ કરતી હતી ત્યારે કોસ્ટગાર્ડ અને ગુજરાત પોલીસ દ્વારા ઓપરેશન હાથ ધરી બોટની તપાસ કરવામાં આવતા આ બોટ માંથી 22 જેટલી ડોલ્ફિન અને 4 શાર્ક માછલીના મૃતદેહ મળી આવ્યા હતા.

આ બોટમાં ડોલ્ફિનનો શિકાર કરનાર આસામ, કેરલા, ઓરિસ્સા અને તામિલનાડુના 10 શખ્સને ઝડપી લીધા હતા. અને વધુ તપાસ માટે વન વિભાગ દ્વારા રિમાન્ડ સાથે રજૂ કરતા આ શખ્સોને 2 દિવસના રિમાન્ડ મંજૂર કરવામાં આવ્યા હતા. વાઈલ્ડ લાઈફ પ્રોટેક્શન એક્ટ સેડ્યુલ 1માં ડોલ્ફિન આવે છે ત્યારે આ શખ્સોના રિમાન્ડ દરમ્યાન ચોંકાવનારા ખુલાસા સામે આવ્યા છે. આ શખ્સોને તામિલનાડુ ના 2 શખ્સે ડોલ્ફિન અને શાર્ક પકડવા કોન્ટ્રાક્ટ આપવામાં આવ્યો હતો અને એડવાન્સ પેટે રૂ. 10 લાખ આપવામાં આવ્યા હતા. તામિલનાડુના 2શખ્સના નામ ખુલ્યા છે ત્યારે વન વિભાગ તંત્ર આ બન્ને શખ્સોને પણ ઝડપવા કાર્યવાહી કરશે.

ઝડપાયેલ શિકારીઓ પાસેથી ડોલ્ફિન ના શિકાર કરવા માટેના હથિયાર પણ કબ્જે કર્યા છે. 2 દિવસના રિમાન્ડ પૂર્ણ થતા કોર્ટમાં રજૂ કરવામાં આવતા તેઓના જામીન અંગે માંગણી કરવામાં આવી હતી પરંતુ સરકારી વકીલ એમ.બી.જાડેજા દ્વારા દલીલ કરવામાં આવતા આ 10 શખ્સોના જામીન જજ ઠાકોરે નામંજૂર કરી શખ્સોને જેલ હવાલે કરવા હુકમ કર્યો હતો.

1 એપ્રિલના સુનાવણી હાથ ધરવામાં આવશે. કુલ કેટલા રૂપિયાનો કોન્ટ્રાક્ટ આપવામાં આવ્યો હતો તે અંગે બન્ને શખ્સ ઝડપાશે ત્યારે વધુ વિગત બહાર આવશે. તપાસ દરમ્યાન જાણવા મળેલ કે આ શખ્સો શાર્કના શિકાર માટે નિકડા હતા અને શાર્ક માછલીના શીંગની માર્કેટ વેલ્યુ વધારે હોવાથી તેઓ શાર્કના શિકાર માટે ડોલ્ફિનનો ચારા તરીકે ઉપયોગ કરવા માટે ડોલ્ફિનનો શિકાર કરતા હતા.