જાહેરનામાનો ભંગ:બગવદરમાં દર શુક્રવારે ભરાતી ગુજરી બજાર કોરોના હોટસ્પોટ બને તેવી દહેશત

પોરબંદર જિલ્લાના બગવદર ગામે દર શુક્રવારે ગુજરી બજાર ભરાઇ છે, જેમાં કોરોનાના જાહેરનામાનો સરેઆમ ભંગ થઇ રહ્યો છે અને વિવિધ શહેરોમાંથી આવતા ધંધાર્થીઓ કોરોના સ્પ્રેડર બની શકે તેવી ભીતી ઉભી થઇ છે.

એક તરફ સરકાર કોરોનાની ગાઇડલાઇનને લોકો અનુસરે તે માટેની દંડનાત્મક સહિતની કાયદાકીય કામગીરીઓ ચાલુ કરી હોય, તેવા સમયે પોરબંદર જીલ્લાના બગવદર ગામ ખાતે ભરાતી ગુજરી બજાર ગત શુક્રવારના રોજ ધમધમતી જોવા મળી હતી, જેમાં કોરોનાની ગાઇડલાઇનના નિયમોનો છડેચોક ભંગ થતો જોવા મળ્યો હતો, આ ગુજરી બજારમાં ઉપલેટા, કુતિયાણા, રાણાવાવ, ખંભાળીયા વગેરે જેવા શહેરોમાંથી ધંધાર્થીઓ પોતાનો માલ-સામાન જેવો કે જુના-નવા કપડા, કટલેરી, વાસણ વગેરે જેવી ચીજવસ્તુઓ વેચવા માટે આવે છે અને બગવદર ગામની આસપાસના ગ્રામજનો દર શુક્રવારે ભરાતી આ ગુજરી બજારમાં ખરીદી કરવા ઉમટી પડે છે, ત્યારે હાલ સમગ્ર દેશમાં વધતા કોરોનાના કેસો વચ્ચે આ ગુજરી બજારમાં આવતા વિવિધ શહેરોના ધંધાર્થીઓ કોરોના સ્પ્રેડર બનીને કોરોનાનો ફેલાવો કરી શકે તેવી ભીતી સેવાઇ રહી છે. તસવીર - ધીરૂભાઇ નિમાવત