સુવિધા:રાણાવાવ તાલુકાની સરકારી સીમ શાળામાં CCTV કેમેરા ફીટ કરાયા

પોરબંદર જીલ્લાના રાણાવાવ તાલુકાની એક સરકારી સીમ શાળામાં સીસીટીવી કેમેરા ફીટ કરવામાં આવ્યા છે, જેના વડે હવે શાળા આસપાસ ચોરી-ભાંગફોડના બનાવો તેમજ શાળાના વિદ્યાર્થીઓની દેખભાળ ઉપર પણ સારી રીતે નજર રાખી શકાશે.

પોરબંદર જીલ્લાના રાણાવાવ તાલુકાના બિલેશ્વર ગામની સરકારી શાળામાં હમણ થોડા સમય પહેલા જ ચોરી થવાનો બનાવ બન્યો હતો, તેવી જ રીતે રાણાવાવ તાલુકાની ભોરાસર સીમ શાળામાં પણ થોડા દિવસો પહેલા ચોરીનો પ્રયાસ અને શાળા સંકુલમાં ભાંગફોડ કરવાનો બનાવ બન્યો હતો. આમ તાલુકાની સરકારી શાળાઓમાં વધતા ચોરી-ભાંગફોડના બનાવોને ધ્યાને રાખીને ભોરાસર સીમ શાળાના આચાર્ય લાખાભાઇ સુંડાવદરાએ પોતાની શાળાની સ્કૂલ મેનેજમેન્ટ કમીટીની બેઠક બોલાવી હતી અને શાળાને સીસીટીવી કેમેરાથી અધતન કરવાનો ઠરાવ પસાર કરી, આ બાબતે એસએમસી કમીટીની મંજુરી મેળવી હતી અને ભોરાસર સીમ શાળાને સીસીટીવી કેમેરાથી અધતન કરવામાં આવી હતી.

આ સીસીટીવી કેમેરા ફીટ કરવાથી હવે રાત્રીના સમયે અને રજાના દિવસો દરમ્યાન શાળાની આસપાસ ચોરી/ભાંગફોડ જેવી પ્રવૃતિઓ ઉપર નજર રાખી શકાશે. આ ઉપરાંત CCTV-કેમેરા મારફત હવેથી શાળાના વિદ્યાર્થીઓની દેખભાળ પણ સારી રીતે કરી શકાશે, જેમાં રીસેસ સમય દરમ્યાન અને ફ્રી સમયે વિદ્યાર્થીઓ કેવી કેવી પ્રવૃતિઓ કરે છે તેના ઉપર નજર રાખી શકાશે. આમ ભોરાસર સીમ શાળા ખાતે સીસીટીવી-કેમેરા ફીટ કરવામાં આવતા શાળાના વિદ્યાર્થીઓ અને વાલીઓએ પણ ખુશી વ્યક્ત કરી હતી.