પાર્સલ ટ્રેન:પોરબંદર શાલીમાર વચ્ચે આગામી 30 માર્ચ સુધી ખાસ પાર્સલ ટ્રેન દોડાવાશે

પોરબંદર-શાલીમર-પોરબંદર વચ્ચે ખાસ પાર્સલ ટ્રેનને આગામી ૩૦ માર્ચ સુધી દોડાવવાનો મહત્વનો નિર્ણય પશ્ચિમ રેલ્વે તંત્રએ કર્યો છે.દેશભરમાં ચાલી રહેલા કોરોના મહામારીકાળ દરમ્યાન દેશના કોઇ સ્થળે આવશ્યક એવી પ્રાથમિક જરૂરીયાતોની ચીજ-વસ્તુઓની અછત ઊભી ન થાય અને પાર્સલ ટ્રેનો મારફત દેશના દરેક ખૂણે આવશ્ય ચીજ-વસ્તુઓનું પરિવહન સરળતાથી કરવા રેલ્વે તંત્ર દ્વારા ખાસ પાર્સલ ટ્રેનો દોડાવવામાં આવી રહી છે. સમગ્ર દેશમાં લોકડાઉન લાદવામાં આવ્યુ હતુ ત્યારથી રેલ્વે તંત્ર દ્વારા ખાસ પાર્સલ ટ્રેનો દોડાવવામાં આવી રહી છે.

જેમાં પોરબંદર-શાલીમાર વચ્ચે દોડતી ખાસ પાર્સલ ટ્રેન હવે આગામી ૩૦મી માર્ચ, ૨૦૨૧ સુધી દોડાવવામાં આવશે તેવો અતિ મહત્વનો નિર્ણય પશ્ચિમ રેલ્વેના તંત્ર દ્વારા કરવામાં આવ્યો છે. જેમાં પોરબંદર-શાલીમાર ખાસ પાર્સલ ટ્રેન નં.-૦૦૯૧૩ પોરબંદરના સ્ટેશન ખાતેથી દર મંગળ, ગુરૂ અને શનિવારના રોજ સવારે ૬:૦૦ વાગ્યે ઉપડશે અને ત્રીજા દિવસે શાલીમાર સ્ટેશન ખાતે સવારે ૬:૩૦ કલાકે પહોંચશે. તેવી જ રીતે શાલીમાર-પોરબંદર ખાસ પાર્સલ ટ્રેન નં.-૦૦૯૧૪ શાલીમાર સ્ટેશન ખાતેથી દર ગુરૂ, શનિ અને સોમવારના રોજ રાત્રીના ૮:૨૫ વાગ્યે ઉપડશે અને ત્રીજા દિવસે પોરબંદર સ્ટેશન ખાતે રાત્રીના ૮:૦૦ કલાકે આવી પહોંચશે.

આ ટ્રેનના રૂટમાં આવતા બન્ને તરફના સ્ટેશનો જેવા કે જામનગર, રાજકોટ, સુરેન્દ્રનગર, અમદાવાદ, આણંદ, વડોદરા, ભરૂચ, અંકલેશ્વર, સુરત, નંદુરબાર, ભુસાવળ, અકોલા, બડનેરા, નાગપુર, ગોંદિયા, દુર્ગ, રાયપુર, બિલાસપુર, ઝારસુગુડા જંકશન, રાઉરકેલા, ચક્રધરપુર, ટાટાનગર, ખડગપુર જંકશન, પાંશકુડ઼ા જં. અને મેચેદા જેવા બન્ને તરફના સ્ટેશનો પર આ ખાસ પાર્સલ ટ્રેન રોકાશે.