અપીલ:યુનિક મોબાઈલ નંબરના મતદારો ઈ-એપીક કાર્ડ ડાઉનલોડ કરી શકશે

કેન્દ્રિય ચૂંટણી પંચ દ્વારા લોન્ચ કરવામાં આવેલા ઈ-એપિક એપ્લિકેશન દ્વારા પાટણ જિલ્લાના યુનિક મોબાઈલ નંબર ધરાવતા નવા મતદારો તેમના ઈ-એપિક કાર્ડ ડાઉનલોડ કરી શકશે.ગત તા.25 જાન્યુઆરીના રોજ રાષ્ટ્રીય મતદાતા દિવસની ઉજવણી નિમિત્તે કેન્દ્રિય ચૂંટણી પંચ દ્વારા e-EPIC (Electronic- Electoral Photo Identity Card) લોન્ચ કરવામાં આવી હતી. જે અંતર્ગત ભારતીય ચૂંટણી પંચ દ્વારા બહાર પાડવામાં આવેલી મતદાર યાદી સંક્ષિપ્ત સુધારણા કાર્યક્રમ-2021 દરમ્યાન યાદીમાં મોબાઈલ નંબર ધરાવતા નવા નોંધાયેલા મતદારો ઈ-એપિક ડાઉનલોડ કરી શકશે. આ ઈલેક્ટ્રોનિક ચૂંટણી કાર્ડને ડાઉનલોડ કરીને ડિઝીટલી સાચવી શકાશે.

ચૂંટણી કાર્ડ ડાઉનલોડ કરવા માટે http://nvsp.in/, https://voterportal.eci.gov.in તથા Voter Helpline Mobile App (Android/ios) એપ્લિકેશનનો ઉપયોગ કરવાનો રહેશે. જિલ્લાના મતદારોને ચૂંટણી પંચ દ્વારા ઉપલબ્ધ કરાવવામાં આવેલી આ સુવિધાનો મહત્તમ લાભ લેવા જિલ્લા કલેક્ટર અને જિલ્લા ચૂંટણી અધિકારી સુપ્રીતસિંઘ ગુલાટી દ્વારા અપીલ કરવામાં આવી છે.