આકર્ષણનું કેન્દ્ર બનશે:રાણકીવાવ પછી પાટણની નવી ઓળખ બનશે ડાયનાસોર ગેલેરી, 100 કરોડનાં ખર્ચે 10 એકરમાં ડાયનાસોર પાર્ક અને સાયન્સ મ્યુઝિયમનું નિર્માણ

પાટણ4 મહિનો પહેલાલેખક: સુનિલ પટેલ
  • સરસ્વતી સેવા સદનની સામે ડાયનાસોર ગેલેરી બનશે
  • પાંચ વિવિધ ગેલેરીઓનાં નિર્માણ થકી વિદ્યાર્થીઓ, ખેડૂતો, સાયન્સ સ્કોલર્સ અને પ્રવાસીઓનું આકર્ષણ ઉભું કરવાનો પ્રયાસ
  • રાજ્યભરનાં લોકો તથા પાટણમાં પ્રવાસાર્થે આવતાં મુસાફરો માટે આકર્ષણનું કેન્દ્ર બનશે

ગુજરાતની પ્રાચિન રાજધાની અને ઐતિહાસિક નગરી પાટણ તેની બેનમૂન વૈશ્વિક વિરાસત રાણકીવાવથી જગ વિખ્યાત બની છે. ત્યારે હવે પાટણની સમિપે ચોરમારપુરા ખાતે 10 એકર જમીનમાં આકાર પામી રહેલા પ્રાદેશિક સાયન્સ મ્યુઝિયમ પણ તેની ઓળખ અને વિશેષતામાં વધારો કરશે. આ મ્યુઝિયમમાં બનનાર ડાયનાસોર ગેલેરી પણ હવે પાટણની નવી ઓળખ બની શકે એમ છે.

10 એકર જમીન પર અંદાજે 100 કરોડનાં ખર્ચે બનશે
પાટણ શિહોરી રોડ પર સરસ્વતી સેવા સદનની સામે સમાલપાટીની સિમમાં રાજ્ય સરકાર દ્વારા 10 એકર જમીન પર અંદાજે 100 કરોડનાં ખર્ચે પ્રાદેશિક સાયન્સ મ્યુઝિયમની સાથે ગુજરાતનાં એકમાત્ર બાલાસિનોર ડાયનાસોર પાર્ક કરતાં પણ મોટી ડાયનાસોર ગેલેરીનું નિર્માણ કરવામાં આવી રહ્યું છે. જે ઉત્તર ગુજરાત સહિત રાજ્યભરનાં લોકો તથા પાટણમાં પ્રવાસાર્થે આવતાં મુસાફરો માટે આકર્ષણનું કેન્દ્ર બની રહેશે.

10 લાખ લીટરની ક્ષમતાનો વરસાદી પાણી સંગ્રહ કરવા માટેનો સ્ટોરેજ એરિયા
ગુજરાત કાઉન્સિલ ઓફ સાયન્સ એન્ડ ટેકનોલોજી (ગુજકોસ્ટ), સાયન્સ એન્ડ ટેક્નોલોજી વિભાગ ગુજરાત સરકાર અંતર્ગત અહીં બનનારા સાયન્સ મ્યુઝિયમમાં જિલ્લાની વિશિષ્ટતાઓને ધ્યાનમાં રાખીને પાંચ વિશેષ ગેલેરીઓનાં નિર્માણ સાથે સુર્યપ્રકાર્‌થી સમય દર્શાવતો સન ડાયલ એરિયા, ઈરિગેશન સિસ્ટમ સાથેનો ગાર્ડન, સુએઝ ટ્રીટમેન્ટ પ્લાન્ટ, બાળકોનાં મનોરંજન માટે ડાયનાસોર રાઈડ્‌સ, હોમ થિયેટર, પર્યટકોનાં રિફ્રેશમેન્ટ માટે ચા-પાણી-નાસ્તો અને જમવાની બેઠક વ્યવસ્થા સાથેની રેસ્ટોરન્ટ, તમામ ગેલેરી સહિત સંપુર્ણ બિલ્ડીંગમાં રેઈન વોટર હાર્વેસ્ટિંગ સિસ્ટમ દ્વારા 10 લાખ લીટરની ક્ષમતાનો વરસાદી પાણી સંગ્રહ કરવા માટેનો સ્ટોરેજ એરિયા, 100 કેવી ક્ષમતાનો સોલાર પ્લાન્ટ જેવી અધતન સુવિધાઓ ઉપલબ્ધ બનાવવામાં આવનાર છે, જેનું કામ હાલ પુરજોશમાં ચાલી રહ્યું છે અને પૂર્ણતાનાં આરે છે.

પાંચ ગેલેરીઓ જિલ્લાની વિશિષ્ટતાઓને અનુરૂપ તૈયાર કરવામાં આવી
સરકાર દ્વારા પાટણ નજીક તૈયાર થતાં આ સાયન્સ મ્યુઝિયમનું સંપૂર્ણ કાર્ય અમદાવાદ સ્થિતિ કનિશ કંસ્ટ્રક્શન દ્વારા થઈ રહ્યું છે અને તેની ડિઝાઈન ટાટા કન્સલ્ટન્સી એન્જનિયર્સ દ્વારા તૈયાર થઈ હોવાનું પ્રોજેક્ટ ડાયરેક્ટર ડા. સુમિત શાસ્ત્રી અને સાઈટ સંભાળતાં અરૂણ કુમારે કહ્યું હતું. ડો.સુમિત શાસ્ત્રીએ કરોડોનાં ખર્ચે સરકાર દ્વારા વિજ્ઞાન અને ટેકનોલોજી ક્ષેત્રે સંશોધન તથા પ્રચાર-પ્રસાર માટે તૈયાર થઈ રહેલાં આ પ્રાદેશિક સાયન્સ મ્યુઝિયમની માહિતી આપતા જણાવ્યુ હતુ કે, આ સાયન્સ મ્યુઝિયમ તથા તેમાં તૈયાર થનાર ડાયનાસોર સહિતની વિવિધ ગેલેરીઓ સમગ્ર રાજ્યની જનતા માટે આકર્ષણનું કેન્દ્ર બની રહેશે. મ્યુઝિયમમાં નીચે મુજબની પાંચ ગેલેરીઓ જિલ્લાની વિશિષ્ટતાઓને અનુરૂપ તૈયાર કરવામાં આવી છે.

ડાયનાસોર ગેલેરી
આ ગેલેરી મુલાકાતીઓને પુરાતન યુગમાં લઈ જશે. પૃથ્વી પર ડાયનાસોરનું અસ્તત્વ હતુ તેમ આબેહૂબ જીવંત કદના ડાયનાસોરને નજીકથી નિહાળવાનો તેમજ ઇન્ટરેક્ટિવ ડિસ્પ્લે, અનિ મેટ્રોનીકસ જેવા ડાયનાસોસર્સ મુલાકાતીઓને મંત્રમૃગ્ધ કરશે તથા ડાયનાસોરનાં ઉદય અને અસ્ત થવાનાં કારણોની સમજૂતી પણ પ્રાપ્ત થશે.

હ્યુમન સાયન્સ ગેલેરી
આ ગેલેરીમાં માનવ ઉદવિકાસ સાથે વિવિધ અંગોના તેમજ પ્રણાલીઓનાં કાર્યો સાથે જિનેટિક્સ જેવા માનવ વિજ્ઞાન સાથે સંકળાયેલા પાસાઓ અને પૃથ્વી પર પર જીવનનાં વિકાસને લગતી રસપ્રદ માહિતીઓનો સમાવેશ કરવામાં આવશે.

હાઈડ્રોપોનિક્સ ગેલેરી
આ ગેલેરીમાં ખેતીની અત્યાધુનિક તકનીક તથા તેની પાછળ કાર્ય કરતું વિજ્ઞાન પ્રદર્શિ કરાશે. મુલાકાતીઓને અહીં કાર્યરત હાઈડ્રોપોનિક ફાર્મ નિહાળવા મળશે, જેથી તેઓને આ તક્નીક વિશે સંપૂર્ણ માહિતી મળી રહે અને રાજ્યના ખેડૂતોને તે અંગે શિખવા મળે.

નાબેલ પ્રાઇઝ કેમેસ્ટ્રી ગેલેરી
આ ગેલેરી રસાયણશાસ્ત્ર ક્ષેત્રે નોબલ પારિતોષિક વિજેતાઓને સમર્પિત રહેશે. જેમાં મેરી ક્યુરીથી લઈને વેંકટરામન જેવા અત્યાર સુધીના તમામ નોબલ પારિતોષિક વિજેતાઓની માહિતી ભવિષ્યના નોબલ પારિતોષિક વિજેતાઓને પ્રેરણા પૂરી પાડશે.

ઓપ્ટિક્સ ગેલેરી
આ ગેલેરીમાં પ્રકાશ પાછળનું વિજ્ઞાન અને તેની ક્રિયા પ્રતિક્રિયા તેમજ પ્રકાશ આધારિત વિવિધ સાધનો પ્રદર્શિત કરવામાં આવશે. અહીં વિદ્યાર્થીઓ પોતાના હાથે વિવિધ પ્રવૃતિઓ કરીને પ્રકાશનાં અદભુત વિજ્ઞાન વિશે જાણકારી મેળવી શકશે.

મ્યુઝિયમમાં ઉજવાયો વિશ્વ પર્યાવરણ દિન
હાલમાં જ ઉજવાઈ ગયેલા વિશ્વ પર્યાવરણ દિને નિમિત્તે આ પ્રાદેશિક સાયન્સ મ્યુઝિયમનાં પ્રાંગણમાં વૃક્ષારોપણ પણ કરવામાં આવ્યું હતું. જેમાં ગુજકોસ્ટનાં સલાહકાર નરોત્તમ સાહૂ, મુખ્ય વૈજ્ઞાનિક અધિકારી પૂનમ ભાર્ગવ, પ્રોજેક્ટ ડાયરેક્ટર સુમિત શાસ્ત્રી સહિત સાઈટ મેનેજર અરુણ કુમાર, એન્જીનિયર જયેશ પ્રજાપતિ સહિતનાં મહાનુભાવો ઉપસ્થિત રહ્યાં હતા. આ પ્રસંગે મ્યુઝિયમમાં ઉપયોગી બની શકે તેવા વૃક્ષો ગરમાળો, કચનાર, ચંપો, ગુલમહેંદી, સપ્તપર્ણી, ગુલમહોર, પેલટા પામ, ખારેક, બામ્બ, વડેલીયા, હમેલીયા, શતાવરી, રેફીક્સ પામ, દુરંતા, રોહીઓ વગેરે જેવા 15 પ્રજાતિનાં 1025 રોપાઓનું વાવેતર કરાયુ હતું.

પાટણ પ્રવાસમાં એક નવું આકર્ષણ ઉમેરાશે
પાટણ જિલ્લા વલ્ડ હેરિટેજ રાણકીવાવ બાદ નવું પ્રાદેશિક મ્યુઝિયમ તૈયાર થયા બાદ જિલ્લામાં આ નવું આકર્ષણ ઉભું થશે. જેના કારણે પ્રવાસનને પણ વેગ મળશે. સાથે આ મ્યુઝિયમમાં પાંચ વિવિધ ગેલેરીઓનાં નિર્માણ થકી વિદ્યાર્થીઓ, ખેડૂતો, સાયન્સ સ્કોલર્સ અને પ્રવાસીઓનું આકર્ષણ ઉભું કરવાનો પ્રયાસ કરાયો છે.

અન્ય સમાચારો પણ છે...