આચાર્ય સંઘની રજૂઆત:પાટણ જિલ્લા બિન સરકારી માધ્યમિક ઉચ્ચતર માધ્યમિક શાળા આચાર્ય સંઘ દ્વારા ધો. 10ના ગુજરાતીના પેપરમાં ભૂલનો લાભ વિદ્યાર્થીઓને આપવા માંગણી

પાટણ જિલ્લા બિન સરકારી માધ્યમિક ઉચ્ચતર માધ્યમિક શાળા આચાર્ય સંઘ દ્વારા ધો.10 બોર્ડની પરીક્ષાના ગુજરાતીના પેપરમાં 4 માર્ક્સ બાબતે વિદ્યાર્થી હિતમાં યોગ્ય નિર્ણય કરવા ગુજરાત શિક્ષણ બોર્ડ,ગાંધીનગરના સચિવને લેખિત રજુઆત કરાઈ હતી.

આચાર્ય સંઘ દ્વારા માર્ચ- 2023માં લેવાયેલ એસએસસી બોર્ડની પરીક્ષામાં ગુજરાતી વિષયની પરીક્ષામાં પેપર સેટરની ભૂલનો લાભ વિદ્યાર્થીઓને આપવા રજુઆત કરાઈ છે. રજુઆત માં વધુમાં જણાવ્યું હતું કે, 14/03/2023 ના રોજ લેવાયેલ ગુજરાતી વિષયની પરીક્ષાના પ્રશ્નપત્રમાં બોર્ડ દ્વારા તા.12/06/2019ના પત્રથી પ્રશ્નપત્રનું પરિરૂપ, ગુણભાર અને બ્લ્યુપ્રિન્ટ જાહેર કરવામાં આવેલ જેમાં વિભાગ-ઇમાં કૃતિ અને કૃતિસંગ્રહ એવાં જોડકાં પૂછવાનો ઉલ્લેખ છે જ નહીં અને તે પ્રશ્નપત્રના માળખાની બહાર જઈને, તેની મર્યાદાને વટાવીને પેપર કાઢવામાં આવેલ છે, જે વિદ્યાર્થીઓ સાથેનો એક અન્યાય જ કહેવાય. એટલે આ ચાર ગુણ જે વિદ્યાર્થીઓને નથી મળતા એ વિદ્યાર્થીઓને પણ મળવાપાત્ર છે. તો પરીક્ષામાં હાજર તમામ વિદ્યાર્થીઓને ચાર (4) ગુણ આપી દેવા વિદ્યાર્થીઓના હિતમાં નિર્ણય લેવા માંગણી અને રજુઆત કરવામાં આવી હતી.