ભાસ્કર એનાલિસિસ:ઉત્તર ગુજરાતમાં પોસ્ટ ગ્રેજ્યુએશન અભ્યાસમાં છોકરાઓ કરતાં છોકરીઓ આગળ નીકળી ગઇ, છેલ્લા 5 વર્ષમાં 55.82 ટકા વધુએ પ્રવેશ લીધો

પાટણ10 દિવસ પહેલાલેખક: તેજસ રાવળ
  • કૉપી લિંક
પ્રતિકાત્મક તસવીર - Divya Bhaskar
પ્રતિકાત્મક તસવીર
  • ઉત્તર ગુજરાત યુનિવર્સિટીમાં 5 વર્ષમાં 29,632 છોકરા સામે 46,173 છોકરીઓનો પ્રવેશ
  • ઉત્તર ગુજરાતની 515 કોલેજોમાં પ્રવેશ લેનારાં વિદ્યાર્થીઓની સંખ્યા 1.28 લાખમાંથી ડબલ 2.40 લાખ થઈ
  • બીજો એક ટ્રેન્ડ; સ્પર્ધાત્મક પરીક્ષામાં ઉપયોગી થઇ શકે તે માટે ધો.12 પછી આર્ટ્સમાં ભણવાનું વધુ પસંદ કરી રહ્યા છે છાત્રો

ઉત્તર ગુજરાતમાં સમયની સાથે દરેક વર્ગમાં શિક્ષણની જાગૃતિ સ્પષ્ટ દેખાઇ રહી છે. પહેલાં બાળકોને ધો.10 કે 12 સુધી ભણાવતા વાલીઓ હવે ધો.12 પછી કોલેજ સહિત ઉચ્ચ અભ્યાસ કરાવતા થયા છે. આ બાબત છેલ્લા 5 વર્ષના પ્રવેશના આંકડા કહી રહ્યા છે. ઉત્તર ગુજરાતમાં ધોરણ 12 પછી ઉચ્ચ શિક્ષણમાં પ્રવેશ લેનાર વિદ્યાર્થીઓની સંખ્યા સતત 20 ટકા વધારા સાથે 1.28 લાખથી 2.40 લાખ સુધી પહોંચી ગઈ છે.

જેમાં યુવાવર્ગ સરકારી નોકરીની અપેક્ષાએ સ્પર્ધાત્મક પરીક્ષાની તૈયારીઓમાં ઉપયોગી બને તે માટે આર્ટ્સમાં અભ્યાસ કરવાનું વધુ પસંદ કરી રહ્યા છે. સૌથી વધુ ધ્યાન ખેંચનારી બાબત એ છે કે, પોસ્ટ ગ્રેજ્યુએશનમાં છોકરા કરતાં 55.82 ટકા વધુ છોકરીઓ અભ્યાસ કરી રહી છે. છેલ્લા 5 વર્ષમાં કુલ 29,632 છોકરાઓની સામે 46,173 છોકરીઓએ એમએ, એમકોમ, એમએસસી, MSC નર્સિંગ અને એમએડમાં પ્રવેશ લીધો છે.

ઉત્તર ગુજરાતમાં વર્ષ 2017-18માં ધોરણ 12 પછી યુનિવર્સિટી સંલગ્ન 515 કોલેજોમાં 1,28,194 છાત્રોએ પ્રવેશ લીધો હતો. દર વર્ષે સંખ્યામાં 20 ટકાનો વધારો થઈ વર્ષ 2021-22માં 2,04,328 વિદ્યાર્થીઓનો પ્રવેશ નોંધાયો છે. એટલે કે, 5 વર્ષમાં 76,143 સંખ્યા વધી છે. ઉત્તર ગુજરાતમાં સૌથી વધુ વિદ્યાર્થીઓ આર્ટ્સમાં પ્રવેશ લઈ રહ્યા છે. વર્ષ 2017-18માં 61,082 સંખ્યા હતી, જે 5 વર્ષમાં વધી 1,06,533 થઈ છે. અન્ય અભ્યાસમાં કોમર્સમાં 7 હજાર, સાયન્સમાં 1 હજાર, LLB માં 1500 જેટલી સંખ્યા વધી છે. તેમજ મેડિકલ, આઇટી ક્ષેત્રમાં વિદ્યાર્થીઓનો પ્રવેશ વધી રહ્યો છે.

પોસ્ટ ગેજ્યુએશનમાં પ્રવેશ

અભ્યાસછોકરાછોકરી
એમએ10,88318,937
એમકોમ8,23411,813
એમએસસી8,05510,393
MSC નર્સિંગ37113
એમએડ2,4234,917
કુલ29,63246,173
(છેલ્લા 5 વર્ષમાં પ્રવેશના આંકડા છે)

5 વર્ષમાં પ્રવેશમાં વધારો

ફેકલ્ટી2017-182021-22
આર્ટસ61,0821,06,533
કોમર્સ20,01327,189
સાયન્સ23,85124,818
મેડિકલ2,3392,351
આઈટી5,2316,690
LLB2,7724,001
અન્ય ફિલ્ડ12,90632,746

દર વર્ષે પ્રવેશ સંખ્યામાં 20%નો વધારો

વર્ષસંખ્યા
2017-181,28,194
2018-191,46,851
2019-201,67,438
2020-211,79,857
2021-222,04,328

​​​​​​​હવે તમામ વર્ગના પરિવારો સંતાનોને ધો.12 પછી ભણાવે છે

2015 પૂર્વે સુખી સંપન્ન, સવર્ણ સમાજના પરિવારો સંતાનોને ખાસ કરીને દીકરીઓને ભણાવતાં હતાં. હવે શિક્ષણ પ્રત્યે આવેલી જાગૃતિને લઈ SC, ST અને OBC સામાન્ય પરિવારો પણ દીકરીઓના ઉજ્જવળ ભવિષ્ય અને સારા પરિવારોમાં લગ્ન થાય તેમજ સરકારી નોકરીની આશા દીકરી અને દીકરા બંનેને ધો.12 પછી ઉચ્ચ શિક્ષણ સુધી અભ્યાસ કરાવતા થયા છે. જેમાં છોકરીઓની સંખ્યા ખૂબ વધારે છે, તેનું કારણ મોટી ઉંમરે લગ્ન, લગ્ન પછી પણ હવે મહિલાઓને મળતી આઝાદી, નોકરી સાથે અને ઘરે બેઠાં થઈ રહેલા અભ્યાસને લઈ ડિગ્રી મેળવવા ઉત્સુકતા વધી છે.> ડૉ.દેવેન્દ્રસિંહ ઝાલા, પૂર્વ ડીન ઉ.ગુ. યુનિ.

એક્સપર્ટ વ્યૂ - ધો.12 પછી સ્પર્ધાત્મક પરીક્ષાની તૈયારી અને ઓછા ખર્ચને લઈ આર્ટ્સ વધુ પસંદગીનો અભ્યાસ, બે વર્ષ ક્રેઝ વધશે
​​​​​​​ઉ.ગુ. ગામડાઓનો વિસ્તાર છે. સ્થાનિક વિસ્તારમાં ધો.9 થી 12 સરળ ભાષામાં અભ્યાસ કર્યો હોય કોમર્સ અને સાયન્સ મુશ્કેલ લાગતાં ગેજ્યુશનમાં આર્ટ્સ વધુ પસંદ કરે છે. બીજી તરફ સરકારી નોકરી તરફ પણ નજર છે. ધોરણ 12 પછી આર્ટ્સમાં સામાજિક વિજ્ઞાન, ભૂગોળ અને ઇતિહાસ જેવા વિષયો GPSC સહિત સ્પર્ધાત્મક પરીક્ષામાં ખૂબ મહત્વના હોય છે. તો ઓછી મહેનત અને ઓછા ખર્ચમાં ઘરે બેઠાં પાસ થઈ જવાય છે. જેથી યુવાવર્ગ કલાસ 1, 2ની પરીક્ષામાં ગેજ્યુએશન ફરજિયાત હોઇ ડિગ્રી માટે આર્ટ્સનો અભ્યાસ પસંદ કરી સાથે સાથે સ્પર્ધાત્મક પરીક્ષાની તૈયારી કરી રહ્યા છે. સ્પર્ધાત્મક પરીક્ષાના કારણે હજુ બે વર્ષ સુધી કોલેજોમાં આર્ટસમાં ક્રેઝ રહેશે. - પ્રો. ડૉ.દિલીપ પટેલ, ઉ.ગુ. યુનિવર્સિટી

અન્ય સમાચારો પણ છે...