ચોરીનો ભેદ ઉકેલાયો:ચાણસ્માના જિતાડો ગામે થયેલી ઘરફોડ ચોરીનો ભેદ ઉકેલાયો, પોલીસે એક શખ્સને ઝડપી દાગીના રિકવર કર્યા

પાટણ શહેર સહિત સમગ્ર જિલ્લામાં બનેલા ઘરફોડ ચોરીના બનાવોને ઉકેલવા જિલ્લા પોલીસ વડા દ્વારા અપાયેલી સૂચના અનુસાર ચાણસ્મા પોલીસે તપાસના ચક્રો ગતિમાન બનાવી તાજેતરમાં ચાણસ્મા તાલુકાના જિતોડા ગામે થયેલી ઘરફોડ ચોરીના બનાવોને ઉકેલી ચોરીમાં ગયેલા સોનાંના દાગીના રિકવર કરી એક શખ્સની અટકાયત કરી આગળની કાર્યવાહી હાથ ધરી છે.

પોલીસે ચક્રોગતિમાન કર્યા હતા
આ બાબતે મળતી હકીકત મુજબ, પાટણ જિલ્લા પોલીસ વડા વિજય પટેલ દ્વારા મિલકત વિરૂદ્ધના બનતા ગુનાઓ શોધી કાઢવા સારૂ કરેલી સૂચનાના આધારે ના.પો.અધિ.ડી.ડી ચૌધરી રાધનપુરનાઓના સીધા માર્ગદર્શન હેઠળ ચાણસ્મા પો.સ્ટેમાં દાખલ થયેલી ઘરફોડ ચોરીના ગુનામાં ચોરીમાં ગયેલા મુદ્દામાલ બાબતે તપાસના ચક્રો ગતિમાન કર્યા હતા. જે દરમિયાન શકદાર રમેશ મોહનભાઇ નથુભાઇ પટેલ (ઉ.વ.53 રહે જીતોડા તા.ચાણસ્માવાળા)ને પકડી તેની ઝીણવટ ભરી રીતે યુક્તિ-પ્રયુક્તિથી પૂછપરછ કરતાં શકદાર રમેશનાઓએ ઉપરોક્ત ઘરફોડ ચોરીને અંજામ આપ્યો હોવાની કબુલાત કરતા અને તેની પાસેથી ચોરીમાં ગયેલા સોનાંના 21 તોલા દાગીના સહિતનો તમામ મુદ્દામાલ રિકવર કરી આગળની વધુ તપાસ ચાણસ્મા પીઆઈ આર.એમ.વસાવા દ્વારા હાથ ધરવામાં આવી હોવાનું સૂત્રોએ જણાવ્યું હતું.

પોલીસે કુલ 1 લાખ 95 હજારનો મુદ્દામાલ કબ્જે કર્યો
પોલીસ દ્વારા રિકવરી કરાયેલા મુદ્દામાલમાં ગળામાં પહેરવાનો સોનાંનો સેટ પાંચ તોલાનો આશરે કિ.રૂ.45 હજાર, ગળામાં પહેરવાનો સોનાંનો સેટ સાડા ચાર તોલાનો કિ.રૂ.આશરે 40 હજાર,સોનાંની ચાર બંગડી પાંચ તોલાની કિ.રૂ. આશરે. 45 હજાર, બે જોડી કાનમાં પહેરવાની સોનાંની બુટી એક તોલાની કિ.રૂ.આશરે 10 હજાર, સોનાની કાનની શેરો આશરે એક તોલાની કિ.રૂ.આશરે 10 હજાર, સોનાની ચેઇન પેન્ડલ સાથેની આશરે પોણા ત્રણ તોલાની આશરે કિ.રૂ.25 હજાર,સોનાંની વીંટી નંગ-02 આશરે એક તોલાની કિ.રૂ.આશરે 10 હજાર, સોનાની બુટ્ટી એક જોડ આશરે એક તોલાની કિ.રૂ.આશરે 10 હજાર મળી કુલ કિ.રૂ.1 લાખ 95 હજારનો મુદ્દામાલ પોલીસે હસ્તગત કર્યો છે.