મેગા રોજગાર કેમ્પ:હેમચંદ્રાચાર્ય ઉત્તર ગુજરાત યુનિવર્સિટીમાં મેગા રોજગાર કેમ્પમાં 40 કંપનીઓ આવશે

પાટણ જિલ્લાની સરકારી તેમજ ગ્રાન્ટેડ કોલેજોના અંતિમ વર્ષના વિદ્યાર્થીઓ માટે 16 માર્ચ હેમચંદ્રાચાર્ય યુનિવર્સિટી ખાતે મેગા પ્લેસમેન્ટ કેમ્પનું આયોજન કરવામાં આવ્યું છે. ગુજરાત શિક્ષણ વિભાગ દ્વારા ચાલુ શૈક્ષણિક વર્ષમાં કોલેજના અંતિમ વર્ષમાં અભ્યાસ કરતા પાટણ જિલ્લાની 14 સરકારી તેમજ ગ્રાન્ટેડ કોલેજો ( આર્ટસ, કોમર્સ, સાયન્સ, લો, બીએડ, બીબીએ, એન્જિનિયરિંગ અને ડિપ્લોમા ) ના વિદ્યાર્થીઓને રોજગારી મળી રહે તે હેતુથી સરકારી ઇજનેરી કોલેજ દ્વારા પ્લેસમેન્ટ કેમ્પનું 16 માર્ચના રોજ ગુરુવારે હેમચંદ્રાચાર્ય નોર્થ ગુજરાત યુનિવર્સિટીના કેમ્પસમાં આયોજન કરવામાં આવ્યું છે.

આ કેમ્પમાં રાજ્યભરની 40 થી વધારે નોકરીદાતા કંપનીઓ ઉપસ્થિત રહી વિવિધ જગ્યાઓ માટે હાજર રહેનાર વિદ્યાર્થીઓના ઇન્ટરવ્યૂ લઈ લાયકાત પ્રમાણે નોકરી માટે પસંદગી કરવામાં આવશે. આ પ્લેસમેંટ કેમ્પમાં 40 થી વધારે કંપનીઓ અને 900 જેટલા વિધાર્થીઓ ભાગ લેશે. ઇન્ટરવ્યૂ પ્રક્રિયા યુનિવર્સિટીના મેથેમેટીક્સ, કેમિસ્ટ્રિ, લાઇફ સાઇન્સ અને ફિજિક્સ વિભાગ માં રાખેલ છે. આ પ્લેસમેંટ કેમ્પ નું સમગ્ર સંકલન પાટણ જિલ્લા ઝોન-2, નોડ-1 ના નોડલ ઓફિસર ડો. એચ એસ પટેલ અને સરકારી ઈજનેરી કોલેજના ટ્રેનિંગ અને પ્લેસમેટ ઓફિસર પ્રોફેસર એસ.જી.પ્રજાપતિ કરી રહ્યા છે.