મતદાન મથકો વધારાયાં:તાલુકા-જિલ્લા પંચાયતની ચૂંટણી માટે નવાં100 મતદાન મથક વધ્યાં

સ્થાનિક સ્વરાજની ચૂંટણી નજીક આવતા ચૂંટણી તંત્ર દ્વારા મતદાન મથકો સહિતની આખરી તૈયારીઓ કરી દેવામાં આવી છે. તાલુકા અને જિલ્લા પંચાયતની ચૂંટણીમાં વિધાનસભા મતદાર યાદી પરથી મતદાન મથકો નક્કી કરાયા છે. જેમાં આ વખતે 100 મતદાન મથકોનો વધારો થયો છે. જેમાં સૌથી વધુ પાટણ તાલુકામાં 18 મતદાન મથકો, રાધનપુર અને સરસ્વતી તાલુકામાં 15 મતદાન મથકો, ચાણસ્મા 10, સિધ્ધપુર, હારીજ અને શંખેશ્વરમાં 8 મતદાન મથકો, સમી-સાંતલપુર તાલુકામાં ચાર મતદાન મથકોનો વધારો થયો છે. વર્ષ 2015ની ચૂંટણીમાં 919 મતદાન મથકો પર મતદાન થયું હતું. જ્યારે 2021ની ચૂંટણીમાં 1019 મતદાન મથકો પર મતદાન થશે.