ભક્તિ:અડીયાના દુધેશ્વર મહાદેવના મંદિરે શ્રાવણના અમાસે મેળો ભરાય છે

હારિજ16 દિવસ પહેલા
  • કૉપી લિંક
અડીયા ગામે દુધેશ્વર મહાદેવ શિવાલયમાં શિવભક્તો ઉમટ્યા. - Divya Bhaskar
અડીયા ગામે દુધેશ્વર મહાદેવ શિવાલયમાં શિવભક્તો ઉમટ્યા.
  • શ્રાવણ માસના પ્રથમ દિવસે શિવભકતો દ્વારા બીલીપત્ર,દૂધ,દહીં રૂદ્ર અભિષેક સાથે પૂજા અર્ચના

ઉતરગુજરાતના ચાર મઠ પૈકીનો એક મઠ એટલે અડીયા જાગીરદાર મઠ તરીકે ઓળખાય છે. જ્યાં 500 વર્ષ કરતા પણ વધુ પૌરાણિક ઐતિહાસિક સ્વયંભૂ પ્રગટ થયેલ દુધેશ્વર મહાદેવનું મંદિર આવેલું છે. જ્યાં પવિત્ર શ્રાવણ માસના પ્રથમ દિવસે શ્રદ્ધાળુઓએ બીલીપત્ર, દૂધ, દહીનો રૂદ્ર અભિષેક કરી પૂજા અર્ચના કરી હતી.

હારિજ અને પાટણ હાઈવેની મધ્ય 15 કી.મી.ના અંતરે આવેલું અતિ પ્રાચીન દુધેશ્વર મહાદેવજીનું શિવાલય શ્રદ્ધા અને આસ્થાનું કેન્દ્ર છે. આ વિસ્તારમાં દુધેશ્વર મહાદેવજીને દૂધનો અભિષેક કરવાની બાધા આખડીની માન્યતાથી લોકોના દર્દ દુઃખ દૂર થવાની લોકોમાં શ્રદ્ધા રહેલી છે. શ્રાવણ માસના પ્રથમ દિવસે શિવભકતો પૂજા અર્ચના અને દર્શનાર્થે ઉમટ્યા હતા. દુધેશ્વર મહાદેવ મંદિર ટ્રસ્ટ દ્વારા નિજ મંદિરે દર અમાસે ધાર્મિક મેળો ભરાય છે અને વિના મૂલ્યે ભોજન પ્રસાદ અપાય છે. જેમાં શ્રાવણ માસની અમાસે મોટો મેળો ભરાય છે.

વડોદરા સ્ટેટના મહારાજા દામાજીરાવ ગાયકવાડ સ્વયંભૂ મહાદેવનું મંદિર બનાવડાવ્યું
આશરે પાંચસો વર્ષ પહેલાં આ સ્થળે ઝાડી જંગલ હતું. તેમાં ચંદ્રમાણા ગામની ગાયો ચરવા આવતી હતી. તેમાં એક સુથારની ગાય દરરોજ આ ગીચ ઝાડીમાં આવીને આ સ્થળે દૂધ ઝરતી હતી. જેને સુથારની ગાય સાંજે દૂધ ન આપતાં ગાયો ચરાવતા માલધારી અને સુથાર વચ્ચે ઝગડો થયો હતો. માલધારીએ ખાત્રી કરવા ગાયનો પીછો કરતાં ગાય દરરોજની માફક જે જગ્યાએ આવીને દૂધ ઝરતી જોઈ સુથારને વાત કરી હતી. બંને જણા બીજે દિવસે નજરો નજર ઘટના જોઇ સ્થળ પર ખોદવા જતાં શિવ લિંગ પર કુહાડીના ઘા વાગતાં દૂધ અને લોહીની ધાર પ્રગટ થઈ અને અવિરત ચાલતી હતી.

આ ઘટના જોઈ બંને જણ ગભરાઈને ગીચ ઝાડીમાં તપસ્યા કરતાં શ્રી ગેડાગિરિ મહારાજ પાસે જઈ પ્રસંગની વાત કરી હતી. મહારાજે તેમની તપસ્યાથી બન્ને ધારાઓ બંધ કરી હતી.તે વખતે શ્રી ગેડાગિરિ મહારાજના તપોબળના પ્રભાવથી વડોદરા સ્ટેટના મહારાજા દામાજીરાવ ગાયકવાડ સ્વયંભૂ મહાદેવના દર્શને પધારી મંદિર બનાવડાવ્યું હતુ. શ્રી ગેડાગિરિજી મહારાજે મહાદેવજીને અડીને ગામ વસાવતાં ગામનું નામ અડીયા રાખવામાં આવ્યું હતુ. અડીયા તેમજ અન્ય ગામની જાગીરો ત્યારથી મહારાજ ગાયકવાડના તમ્રપત્ર અર્પણ કરવામાં આવી હતી. આ સ્થળે ગેડાગિરિજી મહારાજની જીવંત સમાધિ આવેલી છે.

અન્ય સમાચારો પણ છે...