જળ અભિયાન:જળસંગ્રહના સ્ત્રોતોને સહસ્ત્રલિંગ તળાવ અને રાણકી વાવ જેવા બનાવવા સીએમનો અનુરોધ

રાજ્યના મુખ્યમંત્રી વિજયભાઇ રૂપાણીએ જળ સમૃદ્ધ ગુજરાતની નેમ સાથે સુજલામ-સુફલામ જળ અભિયાનના ચોથા ચરણનો પાટણ જિલ્લાના વડાવલીથી આરંભ કરાવતા આ અભિયાનમાં જન-જનને જોડીને જળ અભિયાન જન અભિયાન બનાવવા આહવાન કર્યુ હતું. આ રાજ્યવ્યાપી અભિયાન બે મહિના રાજ્યમાં ગામ-જિલ્લા-તાલુકા સ્તર સુધી ચાલશે. નાગરિક, યુવાનો સૌ કોઇ અઠવાડિયામાં બે દિવસ શ્રમ યક્ષથી અભિયાનમાં જોડાય તેવો અનુરોધ કર્યો હતો.

મુખ્યમંત્રીએ સહસ્ત્રલીંગ તળાવ, રાણકીવાવ જેવા પૂરાતન જળસંચય સ્ત્રોતની વિરાસત જેમ જ વર્તમાન સમયમાં નદી, તળાવો, ચેકડેમ વગેરેની સાફ-સફાઇના કામ કરવા સૂચન કર્યું હતું. પાટણ જિલ્લામાં 493 કામ સરકારી તંત્ર દ્વારા અને 18 કામ સંસ્થાઓના સહકારથી કરવામાં આવનાર છે. જિલ્લામાં 13 કરોડ 97 લાખ ખર્ચ કરવામાં આવનાર છે.

આ પ્રસંગે શ્રમ અને રોજગાર મંત્રી દિલીપકુમાર ઠાકોર, જળસંપત્તિ સચિવ એમ. કે. જાદવ, પૂર્વ ગૃહમંત્રી રજનીભાઇ પટેલ, જી.આઇ.ડી.સી.ના ચેરમેન બળવંતસિંહ રાજપૂત, જિલ્લા પંચાયતના પ્રમુખ ભાનુમતિબેન મકવાણા, જિલ્લા સંગઠનના પ્રમુખ દશરથજી ઠાકોર, પ્રદેશ સંગઠનના પૂર્વ મહામંત્રી કે.સી.પટેલ, અધિકારીઓ ઉપસ્થિત રહ્યા હતા.