ખેડૂતોમાં રોષ:રાધાનેસડાના ખેડૂતોને કેનાલનું પાણી નહીં મળતાં હાલત કફોડી

વાવના સરહદી ગામડાઓમાં ખેડૂતોને સિંચાઈ માટે પાણી મળતું નથી.જેને લઈ ખેડૂતોમાં રોષ ભભૂકી ઉઠ્યો છે. વારંવાર રજૂઆતો કરવા છતાં ખેડૂતોને પાણી મળતું નથી. વાવ તાલુકાના સરહદે આવેલા લોદ્રાણી, નાળોદર, ચોથારનેસડા તેમજ રાધાનેસડા ગામના ખેડૂતોને સિંચાઈ માટે નર્મદા કેનાલનું પૂરતું પાણી મળતું નથી. નર્મદા વિભાગમાં વારંવાર લેખિત રજૂઆતો કરવા છતાં પરિણામ શૂન્ય છે.

ખેડૂતોએ જણાવ્યું હતું કે દર સાલે શિયાળુ સીઝન માટે સમયસર પૂરતું પાણી મળતું નથી. જેને લઈ મોટું નુકસાન વેઠવાનો વારો આવે છે. ખેતરોમાં મોંઘાદાટ ખાતર, બિયારણ બોઈ પાણીની વાટ જોઈ બેઠા છીએ પણ પાણી મળતું નથી. જેને લઈ હાલત કફોડી બની છે.