અનુમાન:થરાદ પોલીસ પરેડ ગ્રાઉન્ડમાં ખડકેલા વાહનોમાં આગ, બે ગાડીને નુકસાન, ગાડીની ગેસ ટાંકી લિકેઝ થતાં આગ લાગી હોવાનું અનુમાન

થરાદ પોલીસ મથકની હદમાં વિવિધ ગુન્હાઓમાં ઝડપાયેલા નાના મોટા વાહનો સંખ્યા બંધ ભેગાં થતાં પોલીસ પરેડ ગ્રાઉન્ડમાં તમામ વાહનોનો ઉપરા ઉપરી ખડકલા કરવામાં આવ્યા છે. ત્યારે શનિવારે બપોર બાદ અચાનક વાહનોમાં આગ લાગતાં પોલીસ કર્મીઓમાં દોડધામ મચી જવા પામી હતી. ત્યારે આગને કાબુ કરવા નગરપાલિકા ફાયર વિભાગને જાણ કરવામાં આવતાં ફાયરટીમ ઘટના સ્થળે પહોંચી આગને કાબુ કરવામાં આવતા પોલીસે રાહતનો દમ લીધો હતો.

આ અંગે ફાયરમેન વિરમજી રાઠોડે જણાવ્યું હતું કે ‘આગ લાગેલી ગાડીની ગેસ ટાંકી લિકેઝ થવાના કારણે આગ લાગી હોવાનું અનુમાન જાણવા મળેલ છે. ગેસ લિકેઝ હોવાથી કોઈએ બીડી ફેંકી હોય અથવા પથ્થર ફેંકવાથી ઘર્ષણ થવાના કારણે અચાનક આગ લાગી હોવાનું કારણ બની શકે તેવું જણાઈ રહ્યું છે. જેથી અમોને કોલ મળતાં ફાયરટીમ તાત્કાલિક ધોરણે પહોંચી જતાં પાણીનો મારો ચલાવી આગને કાબુ કરવામાં આવી હતી.જેમાં ડિટેન કબજે કરેલી માત્ર બે ગાડીઓને નુકશાન થયું છે બાકીની ગાડીઓને જાનહાની થતી બચાવી લેવામાં આવી છે.’આગ પર કાબુ મેળવાતાં વધુ ગાડીઓ આગની ઝપટમાં આવતાં બચી ગઈ હતી.