ચીલઝડપ:થરામાં દોરાની ચીલઝડપ કરી નાસવા જતાં શખ્સને પકડી મેથીપાક ચખાડ્યો

થરામાં તક્ષશિલા સોસાયટીમાં રવિવારે બે શખસો આવી એક યુવતીના ગળામાંથી સોનાનો દોરો તોડતાં યુવતીએ બુમાબુમ કરતાં સોસાયટીના રહીશો દોડી આવ્યા હતા અને સોનાનો દોરો તોડીને ભાગવા જતાં શખસને પકડી મેથીપાક ચખાડી પોલીસને હવાલે કરાયો હતો. જ્યારે એક શખસ નાશી છૂટવામાં સફળ રહ્યો હતો.

તક્ષશિલા સોસાયટીમાં રહેતાં મેનાબેન શંકરભાઇ પ્રજાપતિ તેમજ તેમની પૌત્રી અવનીબેન ભરતભાઇ પ્રજાપતિ રવિવારે તેમના ઘરે બહાર આરામ કરતા હતા. ત્યારે બે અજાણ્યા શખસો ઘરની આગળ ઉભેલા જોતા અવનીબેને કેમ અહી આવીને ઉભા છો કોનું કામ છે. ત્યારે એક શખસે જણાવ્યું હતું કે અમારે પાણી પીવું છે, અવનીબેને કહ્યું હું પાણી લઇને આવું છું તમે દૂર ઉભા રહો તેમ કહેવા છતાં એક શખસ વધુ નજીક આવતાં અવનીબેન આવનાર શખસની દાનત પારખી જતાં બુમાબુમ કરતાં સોસાયટીના રહીશો આવે તે પહેલાં અવનીબેન સાથે ઝપાઝપી કરી અવનીબેનના ગળામાં રહેલી સોનાની ચેઇન તોડી નાસવા જતાં સોસાયટીના રહીશોએ ચેઇન સ્નેચિંગ કરવા આવેલા શખસને ઝડપી પાડયો હતો. અને તેને મેથીપાક ચખાડી પોલીસ હવાલે કર્યો હતો. જ્યારે તેની સાથે રહેલો અન્ય એક શખસ ભાગી છુટવામાં સફળ રહ્યો હતો. આ શખસને થરા પોલીસ મથકે લાવતાં ટોળેટોળા ઉમટી પડયા હતા. થરા પોલીસે શખસની વધુ પુછપરછ હાથ ધરી હતી.