હાલાકી:વાવ,સુઇગામ તાલુકાના 35 ગામોમાં 3 દિવસ પાણીકાપ

દેવપુરા ખાતેથી અપાતાં પીવાના પાણીની પાઇપલાઇનનું મરામત કામ કરવાનું હોઇ વાવ, સુઇગામ તાલુકાના 35 ગામોમાં 3 દિવસ પીવાનું પાણી બંધ રહેશે. ગુજરાત પાણી પુરવઠા અને ગટર વ્યવસ્થા બોર્ડ હસ્તકની બીકે 4 ફેજ 2 જૂથ યોજના અંતર્ગત દેવપુરા ખાતે જળ શુદ્ધિકરણ પ્લાન્ટ મારફત સુઇગામ અને વાવ તાલુકાના ગામોમાં પાઇપલાઇન મારફત પીવાનું પાણી પૂરું પડાય છે. જે પીવાના પાણીની પાઇપલાઇનમાં જરૂરી મરામત કામ કરવાનું હોઇ આગામી 8 થી 10 ફેબ્રુઆરી આમ ત્રણ દિવસ માટે પાણી બંધ રહેશે. જે

માટે વાવ તાલુકાના 15 ગામો અને સુઇગામ તાલુકાના 20 ગામો મળી કુલ 35 ગામોના લોકોએ પીવાના પાણીનો પૂરતો સ્ટોક કરવા જણાવાયું છે. આ અંગે ગુજરાત પાણી પુરવઠા અને ગટર વ્યવસ્થા બોર્ડ ભાભર વર્તુળના ના.કાર્યપાલક ઈજનેર દ્વારા એક નોટિસ ઇસ્યુ કરી વાવ અને સુઇગામ તાલુકા પંચાયત કચેરીઓમાં લેખિત જાણ કરાઈ છે.