માંગ:વાવના ધારાસભ્યની ગૃહમંત્રીને પત્ર લખી લવ મેરેજ કાયદામાં સુધારો લાવવા માંગ

સમાજમાં લવ મેરેજના કીસ્સાઓ વધી રહ્યા છે. જેને લઇ વાવના ધારાસભ્યએ ગૃહમંત્રીને પત્ર લખી લવ મેરેજ કરવા માંગતી દિકરીએ વાલીની સહી, સંમતિ લેવા સહિતના અનેક સુધારા લવ મેરેજ કાયદામાં કરવા રજૂઆત કરી હતી. લવ મેરેજ કાયદામાં 18 જ વર્ષની દિકરી પોતે જેની સાથે લગ્ન કરવા હોય તેની સાથે કરી શકે છે. આ કાયદાનો લાભ લઇને જે લોકોને સમાજમાં કે અન્ય સમાજમાં તેને કોઇ દિકરી આપતું નથી.

આવા ગુન્હાહિત માનસિકતા ધરાવતા તેમજ સમાજમાં બદનામીની છાપ ધરાવતાં લોકો દિકરીઓને લોભ, લાલચ, પ્રલોભન આપી તેની નાદાનીનો તથા તેની ભોળપણનો લાભ ઉઠાવીને દિકરીઓના મા-બાપ, સગા-વ્હાલા અને સમાજને અંધારામાં રાખી ભગાડી લઇ જઇને કાયદાનો ઉપયોગ કરી લગ્ન બીજા જિલ્લામાં જઇને કરે છે. લવ મેરેજ કરનાર દિકરી અંતે પસ્તાય છે અને તે પોતાના પરિવારમાં આવી શકતી નથી અને અંતે આપઘાત કરે છે.

આમ જે દિકરી લવ મેરેજ કરવા માંગતી હોય તે તેના માતા-પિતા અથવા વાલીની સંમતિ અને સાક્ષીમાં તેમની સહિ લેવામાં આવે તે હાલના સમયની માંગ છે. આ અંગે વાવના ધારાસભ્ય ગેનીબેન ઠાકોરએ ગૃહમંત્રી પ્રદિપસિંહ જાડેજાને પત્ર લખી લવ મેરેજ કાયદામાં સુધારો કરી સમાજ વ્યવસ્થામાં મદદ કરવા જણાવ્યું હતું.