કાર્યવાહી:ટ્રક,બસ, જેસીબીના બાકી ટેક્સ વસૂલવા આરટીઓ ટીમ ત્રાટકી

ટ્રક બસ જેસીબી સહિત જુદા જુદા વાહનોના બાકી ટેક્સ વસૂલવા આરટીઓ ટીમ દ્વારા સ્પેશ્યલ ડ્રાઈવ કરી 45 વાહનો શોધી 11.72 લાખ વસુલ કરવામાં આવ્યા છે. પ્રાદેશિક વાહન વ્યવહાર વિભાગ એ બનાસકાંઠા જિલ્લાના 2533 વાહનોના 9.28 કરોડના બાકી ટેક્સ માટે વાહનમાલિકોને નોટિસ પાઠવી છે.રાજ્ય પ્રાદેશિક વાહન વ્યવહાર કમિશનર કચેરીની સૂચનાથી હાલમાં વિશેષ ડ્રાઇવનું આયોજન કરી ટેક્સ ડિફોલ્ટર્સ વાહનોને શોધવાની કવાયત હાથ ધરવામાં આવી છે.

આ અંગેની વિગતો આપતા વાહન વ્યવહાર વિભાગના સૂત્રોએ જણાવ્યું હતું કે બનાસકાંઠા જિલ્લામાં માલવાહક ટ્રક ડમ્પર ટ્રેલર સહિતના 1518 વાહનોના 6.10 કરોડ વસૂલવા, 81 બસ માલિકોને 37.88 લાખ વસુલવા, પેસેન્જર મેક્સી વાહનો 209ના 2 કરોડ વસૂલવા, 100 ખાનગી વાહનોના 13 લાખ વસૂલવા, તેમજ જેસીબી હિટાચી સહિતના 625 સાધનોના 65 લાખથી વધુ વસૂલવા નોટિસ પાઠવી છે. 45 વાહનોના 11.72 લાખનો બાકી ટેક્સ વસુલ કરાયો છે